Сентябрьла 18-19-20-ибти бурхIназир лебил Россиялизир ва Дагъистайзир выборти детерхур. Илди выбортачиб РФ-ла Пачалихъла Думала депутатуни, ДР-ла Халкьла Собраниела ва муниципалитетла депутатунала Собраниелизи депутатуни бикIиб.
Районна 25 муниципалитетлизирад 21 шилизир дурадеркIибтири выборти. Ахъушала районнизир мер-муса хIясибли ца комиссия ва участковый 44 комиссия лерти сари. Лерилра выборти детурхути участокуни гьар секIайзирад гIердуцибтири, техникала шайчирадра, цIализибад ва цархIилтира нукьсандешуназибад мяхIкамдеш барили, гьар мерличи камерабира даршиб, къараултира кабатур.
Сентябрьла 18-личив выборти дехIдихьибси бархIи савли, цархIилтас гIибратли ветаурли, 0019 ибил номерла избирательный участокличи сунела тIама бедес вакIиб «Ахъушала район» МО-ла ад­ми­нист­­рацияла бекIра. Выборти дурадуркIути мер-мусаличиб сегъуна хIядурдеш ва тяхIяр-кьяйда лерал ахтардира дураберкIиб.
Илкьяйдали, районна духIнарти выборти детурхути лерилра шимала бурганира жавабкардешличил чула тIамри дедиб ва лерилра избирательный участокуназир низам-кьяйда хIедуахъи выборти дурадеркIиб.
Выбортачи чула тIамри дедес районна бахъал адамти башулри. Россияла, Дагъиста ва саби хIербируси районна челябкьлаличи уркIи изули, авараагархIебиубли, жавабкардешличил выборти детерхахъес къайгъибариб адамтани.
Лебри выбортачи башули гьести гIямрула адамтира, ишдуслизиб бегI гьалаб тIамри дедес абаибти уршби-рурсбира, администрациябала хIянчизартира, СВО-ла бутIакьянчибира, илдала гъамтира, школабала директортира, мугIяллимтира, Бузерила ветерантира, культурала хIянчизартира ва цархIилтира учреждениебала ва организациябала руководительтира, жавабла хIянчизартира, дурарти мер-мусаличиб хIербирули хьалли, районнизиб прописка лебти адамтира башулри. Гьар мурталра кьяйдали районна, духIнарти къуллукъунала органтала отделла хIянчизартанира халаси хIеруди бирулри, низам-кьяйда хIедуахъес чекабизурлири.
0019 ибил избирательный участокличибра лебри чебетаили бузути комиссияла членти. Дахъал дусмазир ил участокличил выборти дурадуркIухIели жавабкардешличил рузуси, бюллетеньти дедлугуси Загьидат Нестерова сарри, илра выборти дархьли, низам-кьяйдаличил детерхахъес багьандан, чекаризурли хIерудира бирули рузулри.
Районна изберательная комиссияла членти, декIар-декIарти организациябала хIянчизарти гьести гIямрула, арадешлизиб нукьсандеш лерти адамтачи гьарилла хъали-хъайгIи башули тIамри дедлугахъулри.
Районна администрацияла багьахънибала ва СМИ-бачил бархбас бузахъуси управлениела начальник Башир Ибрагьимовли ва илала хIянчизартани заманаличир сайтанази багьахъниби кадирхьули, выборти секьяйдали детурхулил халкьлизи балахъули, хIябалра бархIи халаси хIянчи бариб.
Лебтасалра баркалла биаб гIяхIти тяхIяр-кьяй­да­личил выборти детерхахъес къайгъибарибтас!