Ахъушала район машгьурбарибси ва иличила гIяхIси хабар ахъбиахъубси тухтур сай ГIямаров ХIянипа МяхIяммадович.
ХIянипа ГIямаров акIубси сай Ахъушала шилизив 1941 ибил дуслизив ЧебяхIси ВатIа дергъла бу­тIа­кьян­чила, Ахъушала шилизиб хIурмат сархибси насабла хъалибарглизив. Ишдус ил пагьмучевси тухтур 85 дус виубли сай. Гьаман бикьули рирусра ва илгъуна пикри набра гьанбиркули бирар: – «ХIянипа Мя­хIям­мадовичгъунти адамти бухънабаахъесра гIяйиб саби или». СенахIенну илдигъунти пасихIти, халкьлис манпагIятти, зягIиптачи уркIецIичебти, илди сагъбарес къайгъилизибти хIурматла тухтурти бахъал хIебургар.
ХIянипа ГIямаровли дарибти жура-журала операциябала лугIи багьес хIейрар. Лебилра Дагъистайзив машгьурси, халаси хIурмат сархибси тухтур сай ил. Ахъушала районна больницализив узухIели ХIянипа МяхIяммадовичличи операцияби дарахъес багьандан цархIилти районтазибадра, шагьуртазибадра башутири. Ил серхурси, гъабзадешчевси адам сай, сенахIенну гьарил тухтурли, адамла гIямрулис урехи леб или хIедирути операциябира дарили, адамти сагъбирахъутири ХIянипа ГIямаровли.
1964 ибил дуслизив Дагъиста пачалихъла медицинала институт таманбарибхIели, клиническая ординатурализив левалли ХIянипа ГIямаров дебали секIал балниличивли декIарухъунсири. Ординатурализив учIухIели илини аппендицитла операцияби дирули, сунени касибси санигIятла шайчирти сархибдешуни дирес вехIихьибсири.
1974-1986-ибти дусмазив ХIянипа МяхIям­ма­до­вич Ахъушала районна больницализив бекI тухтурли узули калун. 1986 ибил дусличивад 1991 ибил дус­личи бикайчи Дагъиста арадеш мяхIкамбирнила шайчивси министрла заместительли, 1991-1994-ибти дус­мазив Ахъушала районна бекIли узули калун.
2002-2016-ибти дусмазив МяхIячкъала шагьарлизибси республикала клиническая больницала реконст­руктивная хирургияла отделениела руководитель сайри.
Чинав узули кали виалра ХIянипа ГIямаровлигъуна хIурмат сархес ва баркаллаличи лайикьвикес гьарил адам хIейрар. Бархьдеш дигуси, адамтачи уркIи изуси, сай узути мер-мусаличир умудеш, ибгибдеш, чебетаибдеш гIердуцахъес къайгъилизивси, тухтуртази, медсестрабази зягIиптачи гIяхIси хIеруди бирахъес, жавабкардешличил бузахъес тIалаббируси сайри илини.
Чуйнара дила гъамти адамти зягIипбиркули, ХIя­ни­па МяхIяммадовичличи дугьабилзули, операциябира дарахъили, сагъбиахъубли хъули чарбулхъутири. Ил багьандан, нуни ил тухтур валухIели, илала хъалибаргличил тянишхIели бурес дигулра, дебали пасихIчевси, гIяхIти хIял-тIабигIятличилси, сунечиб гIямрула дебали биштIати адамталара хIурматбируси адам сай ил. Илдала хъалибарглис баркалла багьахъес дигулра лебилра дила тухумтала шайзибад.
ХIянипа ГIямаровла бузери хIукуматлира кьимат­ла­барили саби. ХIянипа МяхIяммадович лайикьви­кили сай Ленинна ва Октябрьская Революцияла ордентачи, «РФ-ла урибси тухтурла», ХIурматла Грамотабачи, Баркаллала кагъуртачи, «ХIурматла лишан» бикIути ва цархIилтира шабагъатуначи.
ЧебяхIси категорияла тухтурра сай, медицинала гIилмуртала кандидатла ура касили сай Ахъушала районнизиб бегI гьалаб илини.
ХIянипа МяхIяммадовичла гIямрула рархкья Шагьрузатра малхIямси, дяхI шаласи, кагибси хьунул адамтала тухтур сари. Ахъушала районна больницализибра Шагьрузатли дахъал дусмазиб акушер-гинекологла санигIят бузахъусири. ЗягIиптачи уркIецIичерси риъни багьандан, халкьла-ургаб баркалла ва хIурмат сархили рузули калун ил.
ХIянипани ва Шагьрузатли хIябал урши-рурси абикьур. Илдира чула бегIтигъунти духути, пагьмучебти, пасихIти, гIяхIти уркIи-хIялла бегIти бетаур. ХIябалра урши-рурсили гIяхIти кьиматуначил школара ва гIур медицинала институт тамандариб.
Шамил ХIянипаевич диагностикала шайчив узуси тухтур сай. МалхIямси, адамтачи дигичевси, сунени касибси санигIятличи валикибси Шамил, сунечи дугьабизурти арадешлизиб нукьсандешуни лерти адамтази жагали гъайвикIули вирар. Камил ГIямаров сунела дудешлагъуна, хирургла санигIятличил вегIиубли сай. Ил Ахъушала районна больницализив бекI тухтурлира узули калун. Камил ил къуллукъличи узес вакIалли, Ахъушала шилизибти бахъал адамти разибирули саби, «уэсгу, сегъуна-биалра къуллукъ чебуркъалли, пагьмучевси, гIяхIил хIянчи балуси тухтур хев гьанна больницализив или».
МяхIячкъалализибси республикала клиническая больницала операционный блокла ва приемно-диагностический отделениела заведующийлира узули калун ил.
ХIянипала рурси Майрусатлира медицинала шайчибси санигIятлис хасдарили сари гIямру. Ил хIулбала тухтурли рузули сари. ХIялалли, халкьла баркалла сархили сунела бузери бирули сари.
Гьанна биалли ХIянипала ва Шагьрузатла дурхI­на­чибад акIубтанира медицинала санигIятличи бегI­биубли, чула бегIти ва хала бегIти кьяйдали халкьлис манпагIятбиэс, зягIиптачи уркIецIичебли хIеруди бирес ва илди сагъбирес кьаслизиб бузули саби.
Аллагьли лебилра арали батаб, чула гIямрулизир ва бузерилизир сархибдешуни имцIадикIаб! Чула дигутани разибирули, хIербиэс кьадарбиаб!