Гьарра шайчивад пагьмучевси
Даргала литературали ва поэзияли советский манзилличибад бехIбихьили ишбархIиличи бикайчи арагIеб улкала литературализи мекелли халаси пай кабихьиб.
Амма 90 ибти дусмазиб гьанбикеслири литература бубкIар или, сенахIенну иличила пикриикIеси манзил ахIенри. Заманали лерилра далдуршуливан, ишбархIи даргала литература ункъси агиличиб саби викIаслира, хатIахIеркус.
Дебали дигесли саби лукIути имцIабикIни, имцIаливан нешла мезли. Лебталалра произведениеби цагъуна даражаличир хIедиалра, амма илдазиб цIилцIилаг леб.
ИшбархIи сабухъчебли лукIутазивад ца сай Усишала шилизивадси БяхIмуд Булатов. Илала творчество гьар шаликарси, декIар-декIарти темабачила саби. ЛукIес БяхIмуд жявли вехIихьибсири, амма илди чина-биалра кадяхъес, делчIес урузкIули, тетрадьла кIапIилизир кавлутири. ГIергъити чумал дус БяхIмудла творчество вавалибяхъиб. Ил вамсни агарли лукIуси поэт сай. ИмцIаливан илини далуйти лукIули вирар. Даршличирра имцIали далай лер БяхIмудла гъайличил даргала ва цархIилти миллатунала далайчибани дучIути. Лерилрара-сера байрумтас хасдарибти назмурти дирар БяхIмудла.
Москвализиб дураибси, сунезира бахъал миллатунала поэтунала назмурти кадерхурси жузлизирра илала гIяхIцад назмурти урус мезли шурдатурлира дурадухъун. Даргала театрли, школабани гьаман пайдаладиру илала назмурти, илди жагали ва саркъахъили дучIа.
Б.Булатов «Даргала Анкъи» бикIуси хIяракатла жигарчевси бутIакьянчира сай.
БяхIмуд акIубси сай мугIяллимтала хъалибарглизив. Дудеш Халадани ва неш ПатIиматли чула гIямру мугIяллимла санигIятлис харждариб. Илдала асарлиув БяхIмудлира Избербашла педагогический колледж белчIи, гIяхIцад дусмазив Усишала, Куркила, БурхIимякьла школабазив музыкала мугIяллимли узули калун. Илкьяйдали БяхIмуд Булатов районна культурала управлениела хIянчизарра сай.
Дебали халаси хIурмат сархес бажардиикиб ил сай акIубси шилизиб ва арагIеб дарганти-ургаб. Илала у хIебакьибси дарган, мажахIят, левли виэс.
Дебали жагали каргьурти, мягIналашал зайдикIути назмурти сари БяхIмудла. Илала цаибил критик сари неш ПатIимат, сарира дахъал дусмазир дарган мезла ва урус мезла мугIяллимли рузули калунси.
БяхIмуд акьули кайили хIевъар, замана лебхIели, дахъал бизити хурегуни ва салатуни диру, илра илис Аллагьли бедибси пагь саби.
Сунела гIямрула рархкья ЖумягIличил илини пергер хъалибарг абилкьули сай. КIелра халати уршби Халадара Казимра ВатIа гьалабси чебла ихъули, гIярмиялизиб саби, виштIалгъуна Мухтар Усишала урга даражала школала учIан сай. Сайгъунти гIяхIялдешлис сахаватти, юлдашуни дигахъути саби илала хъалибаргра.
ГIямрулизир ва творчестволизир гIурра сархибдешуни хIед, хIурматла БяхIмуд Халадаевич. ХIела дигути уршбира хъули ара-сагъли чарбухъи, мякьлар нешра камхIериубли гIямру деркIесли кьадарбиаб. Дирхулра хIела жузани нуша разидирниличи.