Наслу дигичебсили абикьес къайгъилизирси
Кьурбанова ГIяйша Ханаевнала пагьму дебали дахъал шалубарси саби. Илизир цахIнадиркули сари Дагъиста дурхIнас хасбарибси литература, халкьла мухIлила пагьму, публицистика ва педагогика. Россияла писательтала ва журналистунала Союзунала член, литературала шайчирти гIяхIцад премиябала лауреат сарливан, илини мекелли халаси пай кабирхьули сари Дагъиста ва даргала литература, илдачил къяйли миллатла журналистикара гьалабяхI башахънилизи.
Илала пагьмула бекIлибиубси бетуц – дурхIнас хасбарибси литература. Сунела произведениебачил илини чеалкIуси наслу ВатIайчи дигичебсили, гIяхIдешуни дирес гьалаксили, адамдешла черяхIти къиликъуначилсили абикьес халаси къайгъибирули сари.
Кьурбанова ГIяйша Ханаевна, акIубси сари Дахадаевла районна КьярбачIимахьила шилизир 1958 ибил дуслизир. Илини 1986 ибил дуслизиб ДГУ-ла филологияла факультет таманаибсири.
Ил гьала-гьала ХудуцIла шилизир урус мезла ва литературала учительницали рузули калун, гьанна биалли Сагаси Къаякентла урга даражала школализир дарган мезла ва литературала дурсри кадирхьули рузули сари. Устадешличил дурсри кадирхьули, илини миллатла культурала рухIла давла мяхIкамбирнила ва чебирцIахънила шайчибра халаси хIянчи дурабуркIули сари.
1980 ибил дусличирад дехIдихьили, илала назмурти, хабурти, очеркуни районна ва республикала газетабазир ва журналтазир («Замана», «Дагъиста хьунул адам», «Дагестанская правда») дурадулхъули сари. Илала макьалабира аргъбаибти темабас хасдарибти сари, ил лугIилизир – нешла мез мяхIкамдирнила масъултира мугIяллимли газетаби-журналти бучIантас лутIи-хьулчилизирадал гьаргдиру. Журналистикализи мягIничебси пай кабирхьни багьандан, ил «Мургьила чIака» шабагъатличира лайикьрикибси сари.
Ил «Орлёнок – Дагестан» газетали ва ДР-ла писательтала Союзли дураберкIибси «Дагъиста урунжуни» бикIуси конкурсла лауреат ретаурсири. Ил «Россияла патриотуни абилкьулра» бикIуси конкурсличиб «ВатIан багьандан» бикIуси жуз. Цаибил даражала Дипломличил шабагъатларарибсири, ДР-ла миллатла политикала Министерстволи — «ВегIла мез руркъни, тIинтIдикIахъни багьандан ва чеалкIуси наслулис гIяхIси бяркъ бедлугни багьандан» бикIуси ХIурматла Грамоталичил, ДР-ла багьудила ва гIилмула Министерстволи — «Багьуди тIинтIбирнилизиб халаси пай кабихьни ва дахъал дусмазиб чебетаибси хIянчи барни багьандан» бикIуси ХIурматла Грамоталичил.
1984 ибил дуслизиб «БегIлара гIяхIси хабар багьандан» ибси конкурсличиб илала «Муртузла зубари» («Лачин» № 10) бикIуси хабар Дагъиста АССР-ла Дипломличи ва премияличи лайикьбикибсири.
Илала гьалар-гьаларти назмурти «Макьамти», «Сагати урунжуни», «Савгъат» бикIути сборникуназир дурадухъун. ГIур биалли «СихIрукья ретарас», «Агь, жан датла барскъаби», «Дила дунъяра нура» бикIути ил авторла жузи Дагъиста жузала издательстволи дарган мезличил дуракаиб. Илала гIергъи ва гьанна бикайчи илала лугIилашал дахъал жузи дурадухъун. Ил дурхIнас аргъес гьамадти мезличил лукIули рирар. ГI.Кьурбановани хабуртазирад, назмуртазирад, новеллабазирад биштIатази рухIлашалти давлумачила багьахъес къайгъибиру. Илис бикьридеш дирули сари илала «ТалихI багьандан» бикIуси жузли. Ил новеллабала сборник саби. ГIяйша Кьурбановани ил жузла кумекличил даргала литературализиб новеллала жанр дебабариб. Ил жузлизирадти цацадехIти новеллаби газета бучIантасра гьаладирхьулра.