Дарманагарси изай я Аллагь чилра мавцаб, бирарну бахъ къиянни кумекбарес хIейрули. Давла-мас, хазна или лебил гIергъибикили, бегIла халаси давла арадеш саби хIебикIули. Нуша араси манзил бекIлизи кахIейсули, цархIилти секIултачи гьуцIдикIулра.
ДяхIягарси изала чисалра кьадармабиаб, бахъ гIязаббуркIули сабину бунагькарси инса чарх. Гьаннала замана дебали бахъал халкь зягIипли саби. ЗягIипли ибхIелира илдас сегъуна дарман сабаббирусил, балбиркусил балули ахIен. ИшхIелла технологияби, дармунти лерли диалра, илдала сегъуналра гIяхIдеш агара.
Балули ахIенра, заманаличил дарх излуми цIакьдикIулил, ахIи тухтурти мехIурбиублил? Чумилра анцIбукь диубли сари, адамла изала кабизахъес хIебиубти, жура-журала дармунти лукIули гьатIира зягIипбиркахъути, цацабехIти зягIипти биалли, бекIлил бубкIули саби.
Аравиахъес далдурцути шуртIрира дургIели кадилзули ахIен. Мискин-пякьирлисцун ахIенну, арц лебти адамтасра халаси лугIи бучес гьамадли ахIен. Чинад дургути илцад дурхъати дармунти, сен больницабазир илди матъал хIедирутив? Пачалихъла больницаби гьар-чинаралра лер, амма зягIипти адамтас лайикьси даражаличиб кумекбарес илар имканти агара. Ил багьандан цархIилти мера-мусаличи, цацахIели улкала дура арбашесра чевкъули саби.
ВегIлис дигули зягIипиркуси адам левси ахIен. Ил гьарилла сунела кьисмат саби, амма зягIипхIейкес вегIлира къайгъибарес гIягIнибиркур. Камси секIал челукьули биалра, пикрилизи кайсес ва сагъбирахъес гIягIниси саби.
Гьарил адамлис Аллагьли арадеш биахъаб, зягIипти адамтас сабур бедаб. ВегIличи хIеруди бируси адамлис гьатIира къиянбулхъуси саби. Илгъуна анцIбукьличилара хъумуртес асухIебирар.

Анжела Мутазова