Сентябрьла 3 — нушала улкализиб терроризмаличи къаршили ца­диъ­нила БархIили багьахъурси саби. Ил бархбасунси саби ил 2004-ибил дусла сентябрьла 1-3-ибти бурхIназиб Бесланнизибси школа къачагъунани буц­ни­ли­чил. Сентябрьла 1-личиб байрамласи линейкала манзил къа­чагъунала кьукьяли Бесланна 1-ибил школа буцибсири. Илдани 1128 адам: бучIанти, илдала бегIти ва мугIяллимти минабарбарибси школализиб буцибтири. ИтхIели 334 адам алхунтири: им­цIа­тигъунти дурхIни ва хьунул адамти сабри.
Ил бархIи къачагъунала някъбазибад алхунти лебилра ул­ка­ли­зиб хIур­матличил гьанбиркахъути саби: гIядлу-зегъа далтахъути ор­ган­та­ла ва хасти кабизунала хIянчизарти, бузерила къуллукъуни дуза­хъути ва журналистуни, илди-ургаб школала бучIан­тира ва цар­хIил­тира.
Ил бархIи нушала улкала халкьли, терроризмаличи къаршидеш дакIудирули, цауркIдеш чедиахъули сари. Россияла халкьли Бесланнизиб, Дубровка центрлизиб, Буденновсклизиб, Первомайскоелизиб, хъулри даргаибхIели Москвализиб, Буйнакъсклизиб, Волгодонсклизиб, Волгоградлизиб ва цар­хIилтира хIиллабазиб къачагъунала някъбазибад алхунти гIяйи­багарти халкь, гьеч, хъумартес асухIебирар.
Нушаб багьес чебиркур гьарил адам, илала даражаличи хIерхIеили, кахси анцIбукьлизи викес асубируси саби. Нуша цахIнадикилицун дирехIе терроризмаличи къаршидеш чебаахъес.
ИшбархIила манзилра, дявила хасси балбуц бетурхухIели, терроризмала урехи алкIули саби, хаслира — миллатчидешлизиб да­кIубируси, сабира Украинала хасти ва западла разведкабала ка­би­зунани гIеббурцуси. Илдани социальный сетани пай­дала­ди­рули саби, компьютерла хIязаначил жагьилти биргIя­бир­гули. Ил багьанданра нушаб дебали сахъли диэс, вегIла дурхIни ва гъамти мяхIкамбарес чебиркур. Балагь урхIлацун бируси ахIен ва децIли мил­латлара динаналара декIардеш хIебала.
БусягIятла манзил терроризмализибад алхунти гьанбир­ка­хъу­ли, багьес чебиркур, чIянкIли лебилра халкьла цадешличил ва уржибдешличилцун вирар терроризмаличибад чедибдеш сархес. ГIяйибагарти кьурбунти нушани сеналра хъумхIертехIе…