Сергокъалала район гIялимтачиблицун ахIенну машгьурси, илабад бахъал поэтуни ва далайчиби дурабухъунти саби. ИшбархIира илдачибли давлачебли саби Сергокъалала ванза.
УбяхI МулебкIила шимазиб дебали уркIи-хIял разити, сахаватти, пагьмучебти адамти хIербирули саби. Назму цалабяхъес ва далай белчIес хIебалуси, мажахIят, варгиша хIушани илав. Илдала лугIилизив халаси пахруличил бурес вирус Заур ГIялибековла у. Ил пергер далайчила тIамали ну жявлил хIяйранварибсири, амма иличил дила гьунибаъни мез гьаладяхI ардукес акIахъубси «Даргала анкъи» бикIуси хIяракатли балбуц дурабуркIухIели сабри бетаурси. Жагаси тIамаличил далайра бучIули ва къугъали макьамтира дирхъули Заурли даргантала балбуц дебали жагабариб.
Бахъал леб ишбархIи далайчиби, амма илдазивад Заур декIарулхъули сай урхIмешули ахIенси пагьмуличил. Сунела сунени хIябкубти цаладяхъили, авидлизи кабиибти разибирес къайгъилизив вирар ил.
Пахру агарси, чили тиладибаралра далай бучIуси, сегъуна-дигара къушум сунела жагаси тIамали разибируси Заур акIубси сай УбяхI МулебкIила шилизив, гIядатла дубурланна хъалибарглизив. ВиштIахIелил илини школализир ва шила культурала Юртлизир дурадуркIути лерилра далдуцуназир бутIакьяндеш дирутири.
БусягIятла заманара ил культурала Юртлизив узули сай, ва ил­кьяйда мукърачира вашар. Дубуртазиб гIеб-гIебалгьуси, гIя­чихъли зайбикIуси тIамала вегI Заур ГIялибеков бара гьалабван шал­гIеб­бухъунси акIубси бархIиличил мубараквирулра! Заур­лисра илала хъалибарглисра арати гIямру ва сархибдешуни дулгулра.