Ишди бурхIназиб нушала республикализиб Дагъиста халкьанала цадешла БархIи бетерхур. Илис хасдарибти байрамла шадлихъуни дурадеркIиб регионна декIар-декIарти районтазир, шагьуртазир. Ил лугIилизир тах шагьарла бекIлидиубти майдунтачир, шагьарла унхъразир детерхурти далдуцунани нушала республикала халкьла уркIбазир мурхьти къел датур.
Буралли, ил байрам дагъистанлантас дебали мягIничебсира саби, сенахIенну республикализир дахъал миллатунала вакилти уржили хIербирули саби. Илдала гIядатунала хасдешуни, хала бегIтани нушаб букьурли батурси культурала ва рухIла давла гьаргбиуб баягъи далдуцуначир. Дигеслири нушачи Кавказла ва Россияла декIар-декIарти регионтазибад хIурматла гIяхIлира бакIни. Илдази нушала урхIмешули ахIенси культурала жагадеш чебаахъес имканбакIиб нушаб.
Дагъистайс гьар даим машгьурдеш бихуси саби ишабти пагьмучебти адамтани. ХIера, някъли ваяхI дирнила искусство гьалабяхI башахъути пергер устнани чула пагьмурти гьаргдариб районнизирадти майдунтазир. Илдала матяхIли тах шагьарланти ва гIяхIли тамашабирахъулри. Художественный коллективтани биалли, делхъла ва далайла шайчирти чула устадеш чедаахъиб. Илдала пагьмуртазирра нушала хала бегIтала гIядатуни даимдирнила лишанти ва къиликъуни хIясибдирули дирар. Илдала дурарад, жура-журала берклумира гьаладихьилри, чулира миллатла хасдешуни гIячихъли гьаргдирути.
ХIера, илдигъунти далдуцуначир ва байрумтачир да­гъистанлантала культурала жагадеш че­би­­а­хъулицун ахIенну, бекIлибиубси — нушачир хIер­дирути лерилра миллатунала ва­килтала цадешра, цали цала хIур­мат­бирнира сипатдирули сари. Ил ба­гьандан, даширая, нушала культурала букьур чеалкIуси наслулисра мяхIкамбирехIе!