«ГIилму — багьудила гье,
багьуди — къайгъила». Бурала
Сергокъалала район­на ХIур­хъила ши­­ли­зирадси Мя­­хIям­ма­до­ва Хамис Абу­сул­­тIанов­на­чи­ла саби дила белкI.
Ил акIубси сари 1939 ибил дуслизир. Илала дудеш АбусултIан, авал биштIати кали (Хамис дус риубхIели), вебкIибсири. Хамисла неш Сайгибатлис дебали къияннири шилизир хIерриэс, ил багьандан сунела дурхIначил рарх Сергокъалала шилизи гечриубсири. ЧебяхIси ВатIа дергъла дусмазир Сайгибат тылла ветеранна медальличил шабагъатларарибсири.
Сергокъалала цаибил школа белчIи гIергъи, 1962 ибил дуслизиб Хамисли районнизибси педучилищера хъараахъур.
Гьаланачи Хамис АбусултIа­новна судлизир секретарьли, гIур райкомла комсомоллизир рузули калун. Камси заманализиб илаб хIянчи барили, Хамис МяхIяммадова Дагъиста пачалихъла университетла урусла ва дарган мезла, литературала факуль­тетлизи карерхур. 1974 ибил дусли­зиб ил таманбариб. Сергокъалала, ГъурбукIила, Кичи-ХIямрила ва цар­хIилти шимала школабазир чедирти классунас дурсри кадирхьули калун.
СанигIят ункъли балуси мугIяллим сарливан, Хамис АбусултIановна Сергокъалала урга даражала кIиибил школализиб акIахъубси бехIбихьудла урегал класслис хIялумцIлали бетаурси школали­зир рузес рехI­рихьиб. Халаси хIур­мат сар­хибси Хамис Абу­сул­тIа­нов­на, пенсияличи ар­рукьяйчи, 2006-ибил дусличи бикайчи, бехI­би­хьудла классунала учительницали рузули калун.
«Багьурси секIай зарал хIе­биру», — рикIули рирар Хамис Абу­сул­тIа­новна бучIантази.
50 дусцадхIи рузули, ил чебяхIси даражала категорияла мугIяллимла ва Бузерила ветеранна хIурматла умачи лайикьрикиб.
ГIяхIти хIял-тIабигIятла, духуси, ра­зити дугьбачил алавчарти хIул­бур­­кIахъуси, халатасра биш­тIатасра шалати дяхIличил гьунириуси, мал­хIямли гъайрикIуси, пергер хьунул адам риъниличила бурули бирар бахъ­лира.
Х.МяхIяммадовани кIел дурхIя — урши Рашид ва рурси Барият халабаахъиб. Илдазира чебяхIси даражала багьуди касахъили, хъаллабарили, гIямрула гьунчи дураиб. ДурхI­ни жагали абикьнилис Хамис Абу­султIановнас лебил узи-урши бар­калла бикIули бирар.

КIелра дурхIяли нешла са­нигIят чеббикIиб: Рашид ГIяб­дусаламович физкультурала учитель сай, Барият ГIяб­­ду­саламовна биалли — Сер­го­къа­лала урга даражала кIи­ибил школализир бехI­би­хьуд­ла классунала учительница.
Хамис АбусултIановнани бучIа­хъули калунти дурхIни мурталра иличи шадиб гьаббикIули бирар, се­на­­­хIенну илдани чус бяркъ, гIякьлу ва багьудлуми дедибси мугIяллим се­нал­ра хъумхIерту.
«Адам виалли гIяхIси, илала гьарил баркьудира духуси бирар», — би­кIутири гьалаб адамти. Ил ба­гьан­дан Ха­­мис АбусултIановна гъам­­тачил, ба­лу-бирхутачил уркIи-ур­­кIи­­ла­радти, пасихI­ти дугьбачил их­ти­лат­ри­кIули рирар.
Узи-уршила, дурхIнала ва илдала баркьибтала дигили алавруцили, чIумаси арадешличил калаби, хIур­ма­т­ла Хамис Абу­сул­тIа­новна!