Ишдус хIебла замана дебали дахъал заб-марка дарнили Сергокъалала районна агропромышленный комплексличи вайси асар бетаур, гIяхIцад къияндешуни акIахъуб.
ТIабигIятла вайти шуртIрачи хIерхIеили, шила хозяйствола предприятиеби анкIила лайикьси сабухъ сархес бажардидикиб. ГIядатлибиубливан, ил шайчир гьаркьятили детаур «Чедибдеш» колхоз СПК ва М.Р.ГIямаров ИП, чулира гектарличирад 40-45 центнерцад анкIила дучибти.
ИшбархIилис сабухъ бурчнила гехIцIанну кIира процентла хIянчи хъараахъурли сари. 4 824 гектарла чIябарличирад дучибти анкIи дергили умударили сари. АрагIебли район хIясибли, ургабси даражала сабухъ гектарличибад 22 центнерличи абикиб. Дахъалгъунти хIянчи ахирличи дикахъили сари. Иличил дарх гьачамлис хIянчи детурхули лерал дубуртала мер-мусаличир.
«Чедибдеш» колхоз СПК-ла сабухъчебдеш гектарличирад 40-45 центнерличи халбирули саби; М.Р.ГIямаров ИП-ла — гектарличирад 22 центнерличи; ХI.ТIалхIятла уличилси колхоз СПК-ла — гектарличирад 20 центнерличи; «ДешлахIяр» ООО-ла - гектарличирад 20 центнерличи.
Буралли, сабухъ бурчнила илди хIясилтани районна агропромышленный комплекс къиянти шуртIразибра бузес бирни марбирули саби. Хъуми дузахъантала гьалаб мурад тIашли саби — заманаличир калунти авлахъуначирти хIянчи бекIдарес ва 2027 ибил дуслис гIебшнила ризкьи делгIниличи хIядурдеш барес.