УркIи бахъ разили бирар Дагъиста жагьилтачила гIяхIти хабурти дакьасли. Иш гьакIлисра илдигъунти хабурти аргъили, иш белкI барес кайира.
Жагьси боксёр, назмурти лукIес иштяхI лебси Ибрагьим МяхIяммадов акIубси сай Сергокъалала районна Сергокъалала шилизив, 2013 ибил дуслизив. Ил Россияла Игит М.НурбяхIяндовла уличилси Сергокъалала урга даражала 2-ибил школализив учIули сай. Илини ишдус 6-ибил класс таманбариб. Ил сунела гьарил бехIбихьудлизив бегIти дудеш – ЗубагIирли, неш – Раисатли гIевурцули сай. Илкьяйдали илис хIябал рузинира биубсигъуна кумек гIеббиахъули саби.
Ибрагьим, белчIудилизив дебали серхурси сай. ХIера, гьар дус ил, ункъли учIни бангьандан, Грамотабачил шабагъатлавирули вирар.
Ну, 2024 ибил дуслизив филологияла факультетлизив учIухIели, нуша студентуни ил школализи практикаличи дархьибтири. Наб имканбакIиб ил дурхIя учIуси класслизир дурсри кадихьесра. Нуни суал бедес валкьарули ахIенри, илини хъярхъли някъ ахъбурцулри, ва мурталра жаваб гес хIядурли вири. Тяп илкьяйдари цархIилти дурсрачивра.
Ит практикаличиб наб гьанбиркур Ибрагьимла класслизиб «гьари дурхIни чи лева хIуша-ургав назмурти яра хабурти цаладирхъес балуси?» или хьарбаибсири. ГIергъиси бархIи илдала классла руководитель Зайнаб ИсламгIялиевнани набчи 3 учIанни делкIунти назмурти хиб. Илди-ургаб Ибрагьимлара лебри. Ил назму хIушаб барсхIебарили гьалабирхьулра:
Ибрагьим, белчIудилизивцун ахIенну, спортлизивра серхурси сай, илхIелира гIяхIцад сархибдешуни детарахъули. Ил спортлизи ахъибси сай цаибил класслизивад. Илини чумал абзлизир бутIакьяндеш дарили, 1-ибти мерани дуциб.
Ибрагьимли спортла ММА-ла журала мушулбашнила бетуц чеббикIиб.
Илини «Сергокъалализиб дяви» (1-ибил мер), някъ-някъли бирхIнила журализиб (1-ибил мер), ва узби МяхIяммадовхъалас багъишладарибти абзаначир (3-ибил мер) бутIакьяндеш дариб. Илар илини бегIлара гIяхIти хIясилти чедаахъиб.
Илала классла руководитель ГIябдулхIялимова Зайнаб ИсламгIялиевнани иличила ишдигъунти дугьбира дуриб: «Дила классла дурхIни гьар се-секIайзиб жигарчебти саби.
Илди-ургаб леб жагали далайбикIути, булхъути, назмурти лукIути ва ункъли бучIути. Илкьяйдали леб спортла гьуни чеббикIили, ил гьуникад гьалабяхI башутира.
БегIлара саберхуртала къяйлизив сай Ибрагьим МяхIяммадовра. ХIера, илини чумал абзлизир бутIакьяндеш дариб ва гьаларти мерани дуциб. Ил уршила сархибдешунани сунела тухумтицун ахIи, нуша мугIяллимтира, ва сунела классла бучIантира разидирулра. Гьарил дила классла учIанна шайзибад Ибрагьимлис спортла шайчир дахъал сархибдешуни ва кункли ахъанайтачи ацIахъес цIакьра гьамаддешра дулгулра. Ибрагьимлисван, цархIилти классла дурхIнасра арадеш, гьарбизуни дулгулра. Илкьяйдали илдани чула мурадуни детурхахъули, кабихьибси хьулчи даимбирули, ва чус дигуливан гIямру деркIили дигулра».
Ибрагьимгъунти пасихIкарти дурхIначила аргъасли, дила уркIи разили бирар. Ну вирхулра Дагъистайзиб илдигъунти дурхIнала лугIи гьатIиралра имцIабикIниличи.
Ибрагьим МяхIяммадовлис спортлизирра, белчIудилизирра, гIямрулизирра гьарбизуни ва сархибдешуни дулгулра.
Илала хъалибарглис, юлдашунас, классла бучIантас ва руководительлис биалли — чIумаси арадеш. Дерхъаб хIушала гIямру!
МяхIяммадшапи Матаев
