Хайдакьла районна Чумлила урга да­ражала школализиб лутIи-хьул­чилизибадси ремонт дура­беркIили таманбирули саби. Ил миллатла «Ба­гьуди» проектлизи кабурхуси «ДР-ла багьудила кабизлизир дарсдешуни кадикахъни» бикIуси проектла бутIа саби. Объект 85 процентла кьадар балкьаахъурли саби. Шко­лализиб 300-личибра имцIали дурхIя бучIути саби.
Районна бекI Запир ХIясановли ва багьудила, культурала управлениела начальник Мадина Мирзаевани хIянчи детурхнила тяхIяр-кьяйда директорличил дарх ахтардидариб.
Юртла гьалабси бяхI, хутIла гими, классуни ванадирахъути гIягIниахълуми сагадарили сари. Котельная школализибад дурасили, декIарси мерличи хIябал сагати котел даршиб сагати гIягIниахълумачил гIеббуциб.
Дарсдешуни детаур духIнарра. Классуназиб хутIла шала сагабариб, улкьайти ва духIнарти унза дарсдариб. Илкьяйдали жаняхIлизи плитка кабихьили, чIябар, луцри, бурха сагадирули сари. Школалис сагати ваяхI, партаби ва утни асиб. Дурарти унзара дарсдиру. ЦIализибад мяхIкамдеш бирнила кабиз ва видео-камераби даршиб.
Хасси пикри бяхIчиаиб умудеш бихIнила шайчирти шуртIрачи. ДухIнарти хIяжатханаби сагадариб. Илдачил барх декIарси санитарный блок тIашбалтули саби.
Илкьяйдали сагаси спортзал тIашбалтули саби ва школа-алавти мер-мусара сагадирути сари. 90 квадратный метрла мер къирли кабуцес ва кьадуби удатурли шинишбиахъес кьас саби.
Запир ХIясановли школа, кабинетуни, жаняхI хIердариб ва дурадеркIибти хIянчилис кьимат кабатур.
«Багьуди кайснила даражаличи школа сагабарнили бархьаначи асарбируси саби. Миллатла проектунала кумекличил белчIудила заведениебани ишбархIила тIалабуначи далдикибти шуртIри алкIахъули сари, чузибра дурхIнас бучIес, мугIяллимтас бузес иштяхIдухъести. Ил биалли мягIничебси саби мер-муса гьаладяхI аркнилизиб ва багьудила даража ахъбурцнилизиб, — буриб районна бекIли.
Ремонт хъараахъес кьас саби сентябрьла цаличи бикайчи. Илис гIергъи шадлихъ дурабуркIу ва сагаси белчIудила дус Чумлила шила бучIантас сагабарибси школализиб бехIбирхьур.