1996 ибил дусла хIеблизиб нуни МяхIячкъалализибси Дагъиста пачалихъла университетла журналистуни хIядурбируси отделениела цаибил курс таманаибсири. Нушала отделениела ца декIардеш лебсири, гьар дус илаб практика дурабуркIусири. ЦархIилти студентуни хъули, шими-шагьуртази чула бегIтачи аркьухIели, ну Редукторный поселоклизибси издательствола Юртлизи вашусири. Ит манзил ил ахъти хъулразибад ца сабри. Сунела куц сунела замана чебетаибси биэсра асубири, гьанна биалли ил циила буркьбиублири. Пикриухъалли, 1996 ибил дусличибад гьаннара илцад-декIар барсбиубси секIал агара.
Ну дебали урузикIулри. Наб тамашабилзусири республикала газетализиб сегъунти пагьмучебти адамти бузутира или. Нуни чумал журналистла макьала дучIутири. Дигахъира ил газета школализив учIуси заманара. Ит манзил телевидение, радио, газета дебали машгьуртири ва илдала халаси асар лебсири. Гьанна сари Интернетли илди лерилра кIиибил даражаличи ардякьяхъунти.
Ну гехIъибил дерхIличи ацIира. БекI редактор, итхIели ГъазимяхIяммад Юсупов вирусири, ил сунела кабинетлизив хIергира. Чилирил ил площадьличив сай, хIела масъала жавабла секретарьличил бекIбарес вируд или кабинет чебаахъиб. Жавабла секретарь сайри Ильяс ХIусейнов. Саламра бедили дила мурадличила бурира. Илини «направление чинаба» или хьарбаиб. Нуни ил сасес хъумартурли увухъунра.
— Чихъали балада хIуни нушала журналистуни? — дарган мезли хьарбаиб илини.
Нуни дила дудешла узи ГIяли ГIялиев гьанушира. Илини «Дагъистан» ГТРК-ла радиолизибси даргала редакциялис бекIдеш дирутири. Илини иличи зянкъдяхъиб. Гъайбухъун. Илди юлдашуни буилри. «ГIяхIси саби, — иб илини набзи, — жагIял вакIи редакциялизи, направлениера кабуха ва редакторличи ацIи».
ГIергъиси бархIи ну сагали редакциялизи вакIира. Кабухира направление. БекI редакторли ну Ражаб Адамадзиевличи вархьира. Илини культурала ва кагъуртала отделлис бекIдеш дирулри. Илини набзи кагъурти хIердирахъес хъарбариб. Ил отделлизир сарри дила цаибти макьалаби делкIунти. Нуни поликлиникабазир рушбатуни сайсниличила цаибси макьала белкIунсири. Ражаб Ражабовичли дила макьала ГъазимяхIяммад ЖабрагIиловичличи арбухибсири, ил кабяхъяхъес асубирарал хьарбаэс. Наб гьанбиркур ил кабинетлизи ацIили, ишаб селра имцIаси агара, кабяхъая или бурибсири. «МикIхIила лугъатли малукIад, литературала мезличил белкIен», — викIули набчи дугьаизурли, дуравхъунсири.
Ахирличи бикиб дила практика. ГIергъити кIел дус гIурра ил газетализи вашусири ну практикаличи. Дила бузерила гьуни нуни радиолизиб бехIбихьибсири, ва газеталичил бархбас бузахъусири. 2017 ибил дуслизив ну редакциялизи хIянчила кайибсири. Нуни дахъал гъай дурес вирус набчил бузути адамтачила. Бурасли, илаб лебилра тяништи адамтиван, хъалибаргван бузули саби. Ил дебали гIяхIсира саби. Бахъал жагьилти журналистуни леб. ХIебиалли, умут леб дарган мез гьачамлис детхIейхъниличи.
Замана барсбикIули саби. ГьаладяхI дашули сари технологияби. Интернетли буцили саби цаибси мер. Илабад саби нушала адамтани чус хIяжатси багьахъни имцIаливан бургуси. Кагъарла газета камли бучIули саби. Дусличиб-дус камбикIули саби ил къулбасбирутала лугIира. Се барес вирара, сагати технологияби пайдаладарили, редакцияла хIянчи барсбарили саби. Сепайда, нушала дебали давлачебси пачалихъла, миллатла мезла редакциябазиб бузути журналистунас ва цархIилти хIянчизартас бедлугуси алапа дебали камси саби. ИштяхI агарси мерла чи лявкьуси узес? Дахъал къайгъни дакIударес хIяжатли саби хIянчи гьалаб кьяйдали кабизахъес ва газетала хIурмат-кьимат имцIадарес багьанадан.
Ишдус нушала газета 105 дус бируси саби. Баркалла нушала бучIантас ва газетала юлдашунас. ЖагIялла бархIиличи умут бетмайхъахъидая.