Гъану цара ибил даршдуслизир дахъал дарсдешуни детаур. Гьамадси хIянчи баргес умцIули саби бахъалгъунти. ГIяхIцад адамти сценаличи абацIес къайгъилизибра чебиур. Сагати технологияби пайдаладарили, бекIлил пагьму агартира «зубарти» бетарули саби. Амма илдачи ургIебли леб ЧевяхIсини жагаси тIамара бедили, алавчарти гIяшикьбиэсли далайбикIути далайчиби. Илдигъунтала лугIилизир пахруличил рурес вирус Раисат МяхIяммадова.
Ил акIубси сари Хайдакьла районна ЦIурхачила шилизир. Илала хала дудеш Ахъушала районна ХIерхмахьила шилизивадсири, хIянчи баргес багьандан, ил ЦIурхачила шилизи гечиубсири. Илаб илини сунела кьисмат цабариб сайван хIянчи баргес ракIибси хуршлан исбагьичил. Кьисматли илис цархIил районна ванзаличив хIериахъес кьадарбиахъуб. БусягIятра илала халаси хIурмат леб ЦIурхачиб. Амма илини сай акIубти мер-мусара хъумуртути ахIенри.
ДалайрикIес Раисат жявлил рехIрихьибсири. Илини шилизир дурадуркIути лерилра шадлихъуни разили шалгIердалти. ИшбархIи Раисат, халаси репертуарра сарира, гIялам гIяшикьбирули, далайрикIули сари. Ил рузули сари Ахъушала культурала КIялгIялизир.
Илкьяйдали Раисат «Даргала анкъи» бикIуси хIяракатла жигарчерси бутIакьянчира сари. Илини лерилра гьунибаъниби жагати далуйтачил гIердурцу.
ИмцIаливан Раисатли СягIидуллагь ГIябдуллабековла, БяхIмуд Булатовла ва РабаданхIяжи Юсуповла назмурти хIясибли далуйти дучIули сари. Халаси мягIна бухIнабуцибти, жагали каргьурти дугьбачил дучIа Раисатли сунела далуйти.
Ил, жагаси далайла устацун ахIенну, пергер нешра сари. Илала ца урши лев, сайра колледжлизив гIяхIти кьиматуначил учIуси. Ил нешла пахру сай.
ГIямрулизир ва творчестволизир гIурра сархибдешуни диаб, хIурматла Раисат МяхIяммадова!