МяхIяммадова Масай БяхIяндовна акIубси сари 1949 ибил дуслизир Урхьучимахьила шилизир, хIурматла хъалибарглизир. ГехIел дусла школа таманбарили гIергъи ил карерхурсири Дагъиста медучилищелизи. Ил 1971 ибил дуслизиб медучилище таманбарили, Ахъушала шилизибси районна больницализир медсестрали рузес рехIрихьибсири.
1974 ибил дуслизир Масай БяхIяндовна ЦIу­ни­ма­хьилизибси медпунктла заведующаяли рузусири. Гьар бархIи хIябал километрла гьарахъси мерличи, къадурбазирад, къиянти мер-мусаличирад, бу­гIяр­ли-ванали хIеили, дяхIи-заб диаллира, рашули медпунктлизиб урегал дус сунечи хъарси, хIялалси бузери бариб илини. Гьачам декабрьличир, хIянчиларад хъули чаррулхъухIели вайси анцI­букь­лизи рикиб, лусентачирад катхIел, къадала карикиб.
Илала гIергъи арадеш къулайбиубхIели, бухгалтерла курсани делчIи, 1981 ибил дусличирад рехIрихьили Масай МяхIяммадовани «ХIунтIена партизан» бикIуси колхозлизиб сунела бузерила гьуни даимбариб. Колхозла профкомла председательлира рузули калун.
1985 ибил дуслизир Масай БяхIяндовна Дагъиста пачалихъла университетлизи карерхур. Университетла филологияла факультет чеббикIили урус мезла ва дарган мезла отделение таманбариб. 1993 ибил дусличирад рехIрихьили, Урхьучимахьила урга даражала школализир гьаннара рузули сари.
ЯхIчерси, сабурчерси, гьарра шайчирад пагьмучерси, халкьла уркIи аргъибси, гIяхIти уркIи-хIялла регI Масай МяхIяммадовани чинар рузули риаллира, коллективла-ургаб хIурматра сархили, сунечи хъарси хIянчира чебетаахъили, бетурхахъули сари.
Масай БяхIяндовнани уршира-рурсира абикьур, гIяхIси багьудира касахъили, бяркъра бедили. Урши – ГIябдуллаев Ислам Сулайбановичли, нешлагъуна санигIят касили, школализив физикала дурсри кадирхьули узули сай.
Масай БяхIяндовна 2008-ибил дусличирад Урхьучимахьила шила администрациялизир бекIлириубси специалистлира рузули сари.
Илини мурталра адамтас гIяхIдешцун биру. МанпагIятриэс, къуллукъ бетаахъес къайгъилизирси, халкьлис дигуси хьунул адам сари ил.
Пачалихъла шайзибадра Масай БяхIяндовнала бузери чихъли кьиматлабарили саби. Дахъал дусмазиб хIялалси бузери барнилис «Ахъушала район» МО-ла администрацияла шайзирад ХIурматла Грамотабачил шабагъатларарили сари, 2011 ибил дуслизир лебил Россияла кьадрила яргаласи нешла мезла ва литературала олимпиадаличиб чедибдеш сархибси учIан ункъли хIядурварнилис багьудила управлениела шайзирад Грамоталичи лайикьрикиб. 2010-ибил дуслизиб бетурхуси лебил Россияла кьадрила халкьла перепись гIяхIти тяхIяр-кьяйдаличиб хъараахъес багьандан къайгъибарнилис, пачалихъла хасси кабизла шайчирад ХIурматла Дипломличил шабагъатларариб. Масай БяхIяндовнала гIуррара дахъал шабагъатуни лер.
Масай МяхIяммадова гьанна дурхIнала дурхIни абикьахъесра кумеклариэс къайгъилизир сари.
Илала уршила шел дурхIя леб, халалгъуна, мугIяллимла санигIятличи вегIвиубли, школализив историяла дурсри кадирхьули узули сай, кIиэсил районна РОВД-лизив узули сай, хIябэсилли ишдус институт таманбарили сай, гIергъити кIелра школализиб бучIули лебал.
ХIурматла, халкьлис дигуси Масай МяхIям­мадовала гIямрулизир ва бузерилизир сархибдешуни, арадеш имцIадикIаб. Сунела дигутани разирирули хIерриэс кьадарбиаб, сунела ахIерти кьисматли ахIерабараб, даршуси челябкьлара биаб!