Гьалабван нушала редак­циялизи Хай­дакьла районна Бар­шала ши­лизибадти нушала газетала бахъ­хIила гьалмагъуни Сул­тIанбек Сул­тIа­нович МяхIям­мадов ва поэт, да­луйти лукIан МяхIяммад Рашидов гьаб­ба­кIиб.
Илди издательствола юртлизи бакIнила мурадра, гьести гIям­руличив, пенсияличив виалра Сул­тIан­бек СултIанович Россияла жур­налистунала Союзла члендешлизи кьабулварили, иличила бикьридеш дируси удостоверение касни сабри.
СултIанбек МяхIяммадовли ва Мя­­­хIяммад Рашидовли нушала хIян­чи­­зартачил барх бизити чяй­личил, муридешуначил баршибси стол-алав жагаси ихтилат дураберкIиб.
СултIанбек СултIанович дахъал дусмазив школала мугIял­лим­ли, 31 дус школала дирек­тор­ли узули калунси адам иш­бар­хIила дурхIнани неш­ла мез хIедал­ни­личила пик­ри­икIул­ри ва ил бяхI­чибизлизир че­лябкь­­ла­ли­зир­ра су­нела цIакьани ка­ди­хьес хIя­дур­ли­ри.
СултIанбек СултIановичли 1961 ибил дусличивад вехIихьили Хайдакьла районна шимала школабазив ва сай акIубси Баршала шила школализив асилдешличил узули халаси хIянчи бариб. Ил директор вирухIели, Баршала урга даражала школали лебил Россияла «Дусла школа» бикIуси конкурслизир 2000-2005-ибти дусмазир бутIакьяндеш дариб, сай биалли «Дусла директор» ветаур.
Илини узути дусмазир касибти шабагъатуначила бурес ца кIапIила бяхI биули ахIен, ил багьандан лерилра илди гьанхIедуршис, амма дурхIнази секьяйда багьуди кайсахъусил илини ункъли балули сай. Гьаннала шимала школабазирти тяхIяр-кьяйдаличира ил разили ахIен.
«ХIебирар багьуди агарти адамтани дурхIнас багьуди бедес, хаслира дурсрира кахIедирхьули диалли. Секьяйда нешла мезли бучIесра лукIесра бурсибирара дурхI­ни жу­мягI­лизиб дарган мезла ца дарс кабирхьули биалли, яра илра кахIе­би­хьили цархIил предметличил барсбирули биалли. Бархьси ахIен нушала депутатунани дурхIнази нешла мез дагьахъесра хIедагьахъесра илдала бегIтази ихтияр бедни. ДурхIни нешла мезли бучIес ва лукIес бурсибарес чараагарли гIягIниси саби.
Ну, нешла мезличил дархдасунти, гьаннала заманала тя­хIяр-кьяй­даличи хIерикIулра. Ил ма­съала ахъ­бурцули саби «Замана» газетали ва ДГУ-ла филологияла факультетли. ГIур иличила гъайикIусира агара. Ил ма­съала лебилра жамигIятли ахъбу­цес гIягIнили саби. Депутатуначи жа­­ми­гIятла вакилти дугьабизурли, шко­лализи нешла мезла дурсри чардарахъес гIягIнили сари. Илкьяйда хIе­барахIелли, нушалара челябкьуси нас­лулара ургабси бархбас бетихъур. Саби чихъали са­бил хIебалуси нас­лу халабиур» — ви­кIулри ихтилатли­зив Сул­тIанбек Сул­тIанович.
Ишдус СултIанбек Сул­тIа­нович 85 дус виънила юбилейла дус саби. Илини дурхIнас багьудлуми дедлугули гIямру деркIили сай. Илала пикри бархьси биъниличи гьайгьайрагу нура, лебилра нушала хIянчизартира бирхули саби. Нушани ил газета бучIантачи баахъили дигухIели сайри илини ихтилатбарибсира. Нешла мезла, нушала дурхIнала челябкьлаличи илала уркIи изахъули саби. Ил багьандан сай илини ил масъала ахъбурцусира.
Илала пикрумачил кьабуллири мякьла кайибси МяхIяммад Рашидовра. Илини сунела кьаламла вархкьяла юбилейлис назму багъишлабарилри. Ил нуни дарган мезличи шурбатурра ва газета бучIантас гьалабирхьулра. Илизиб бурили саби сегъуна адам саял СултIанбек СултIанович МяхIяммадов.

Нушала педагог ва журналист,
БехIбихьуд касибси Баршализибад,
Ламусла ва яхIла дурхъал ванзала,
СултIанбек СултIанович
хIед хIурмат-кьимат.

Багьудила шала шантас алкунси,
Пергерси педагог ва насихIятчи,
Буркьа Баршазибад сагаси Барша,
Гьуни кабихьибси багьудлумала.

ХIурматла учитель ва белкIла уста,
Улкалис хIялалси хIянчи барибси,
ДелкIунти ухули гIямрула гьунчир,
Хайдакь шалабариб хIела гIякьлули.

Дусмазир детхIейхъур
делкIунти хIуни,
ГIурлизир лукIути сари дурхъали,
Илис бикьри саби Москвализибад,
Бархьибси документ Союзла членна.

ХIу акIубси ванза хабарла Хайдакь,
ПасихI белкIаначил чебяхIбарири,
Хайдакьлира хIечи пахрубирули,
ХIурмат-кьиматличил алавуцилри.

СултIанбек СултIанович хIед арадеш,
Даим бугабикIаб лукIуси кьалам,
Баршализиб калаб хIела сархибдеш
БелкIаназиб ухаб мурталра
бархьдеш.