Ишдус «Замана» газета дурабулхъес бехIбихьибхIейчирад 105 дус диркули сари. Илцад дусмазибси миллатла тарих мяхIкамбируси, наслубала бархбас къябхIевдахъуси умхьули ил бетарули саби. Редакцияла архивлизирти газетаби садирхъухIели, даршдусмазиб хIербирути даргантачила, илдала бекIахъудила бетуцла, бузерила тамашалати баянтачил ну тянишрирулра. «Ленинна байрахъ» бикIуси уличил итди дусмазиб дурабулхъуси газета наб гьатIира тамашаласили билзули саби. СенахIенну, илар имцIаливан шимазиб хIербирути адамтачила ва илдала гIямру­ли­чила белкIани дахъал сари.
«Замана» газетала редакциялизиб дила бузерила гьуни 2018 ибил дуслизиб бехI­би­хьибсири. БегI гьалар ну иша ракIибсири университетлизир ручIухIели, практикаличи. Ит замана газетала хIянчиличи, редакциялизирти аги-хIяйчи дила карцIидухъунтири, ва набра ишар рузес биалри или гьанбикибсири. Магистратурализи ручIес карерхурхIели, ну хIянчила кариэс ибси пикриличил гьачам-гьатIи редакциялизи ракIибсири ва Салимат ГIялиевачи дугьаризурсири. ИтхIели газетала бекI редактор вирусири Юсупов Арсен ГъазимяхIяммадович. Илдани набзи кIел макьала делкIахъес хъарбарибсири ва илди хIясибли ну хIянчила руцибсири. Дила хъулир гьаннара илди кIелра макьала кадяхъибти газетаби лер. Арсен ГъазимяхIяммадовичла тIалабуни имцIали дири, амма илди дархьти дири. Илдигъунти руководительти дебали камли бургар или гьанбиркули саби. Сунела хIянчизартачи гьарли-марли уркIи изуси адам сай ил. Кадизахъурти низам-кьяйдаличи ил мурталра чекайзурси вири. Гьаланачи сунени лерилра илди детерхахъурли, гIур биалли хIянчизартазирад жавабкардеш илини тIалабдирутири. БекI редактор сайливан гьарилли бибгIян-кьяш секIайзибра илини нушаб мурталра гIибрат чебиахъи. Арсен ГъазимяхIяммадовичла бекIдешлиуб «Замана» газетала бузерира ахъси даражаличи абикиб….
Ну газетализи рузес ракIнила бекIлибиуб­си сабаб — нешла мезличи диги сари. Салимат ГIялиевани ну нешла мезла дунъялизи, хала бегIтачибад букьурли баибси рухIла давлала хазнализи някъ буцили рухIнакаира или рикIес рирус. Бузерила цаибти гунзри кайцIухIели, ил мурталра набчил рарх рирусири ва кумекбирусири. ИшбархIила манзиллизирра редакцияла хIянчизартас ил мурталра хъарихъли ретаруси сари. БекI редактор рирухIелира илини сунела арархниличи хIерхIеили, нушаб насихIят бурес, кумекбарес мурталра замана бургули рири. БекI редактор сарливан иличи бахъал гIяхIли башули бири. Гьарилличи уркIи гьаргли, дяхI шалали дугьарилзули, малхIямли, дукелцIиличил гъайрикIуси иличи дила мурталра карцIидулхъи. Салимат багьанданра бахъалгъунти меценатунани нушала газета гIеббурцуси бири или гьанбиркули саби.
Дусми аркьукад газетала бузерира барсбикIули саби. Цифровизацияла манзиллизир, жамигIятла-политикала газета биъни багьандан, тIалабунира дарскадикIули сари. Социальный сетаначи имцIали пикри бяхIчииули саби. Адамтани газетаби камли дучIни ил анцIбукьлис сабабли бетарули саби. Масала арбякьунси дуслизиб, илдигъунти тIалабунала дазурбазиб, ИсмягIилов ГIябдуряхIман МяхIяммадрасуловичли нушала бузери гьатIира жигарчеббиахъуб. Заманаличил варх гьалавяхI ганзикIуси илини, нушара дахъал сагадешуначи бурсидарира. ДурадуркIути далдуцунала лугIи имцIабиуб, хIянчилизир сагати рангани дагьардиубхIели, жагьти хIянчизартира иштяхIличил бузескабииб. Дусла духIнар дахъал конкурсуни, викторинаби, школабала бучIантачил гьунибаъниби, абхьибти дурсри нушани дурадеркIира. Халатас ва жагьилтас тамашали кабизурси «Элиас» бикIуси хIяз хIяйна дураберкIира. Ила бахъал хIурматла гIяхIли бакIиб. Цали ца чебаэс, гъайбухъес ва тамашали замана дурабуркIес дигути дарганти хIязличи башиб. ГIур сагадешуначила бурахIелли, цалра газетализиб аргаси далилли бетарули саби, нушала газетализир гьаладирхьути куар-кодуни. Автортала макьалаби дучIесцун ахIи, илдачи лехIирхъесра бучIантас имканбакIиб. Илра ГIябдуряхIман МяхIяммадрасуловичла хIянчи сабри. ЛугIурбала Министерствола ва нушала Агентствола сипта хIясибли, «мицIирси газета» бикIуси сагадешра акIахъуб. Хасси приложениела кумекличил газетализибси сурат хIясибли, видео чебаэс вирули сай. Ил журала сагадешунани газета гьалабяхI бикни дигеси анцIбукьли бетарули саби.
Гьар дус газета жагьбикIули саби. БахъбикIули саби ишаб бузути жагьилти адамтира. Чумал дус гьалар хIянчизартазирад бегIлара риштIаси ну рирусири. Гьанна биалли, набчибра биштIати шел хIянчизар леб. Илра мекелли мягIничебси анцIбукьлизи халбирулра. СенахIенну мез дигахъути, жагьилти лебай илди детхIейхъниличи умутра имцIабикIули саби. Мез дузахъули лералли, миллатра мицIирли кавлуси саби. Ил багьандан нуша дарганти диъни марбируси, нушачицун хасси рухIла давла мяхIкамбирехIе. Дила дигуси «Замана» газеталис бузерилизир гьатIира сархибдешуни дулгулра. Дусличиб-дус вавалибирхъули, гьарил дарган адамла хъули биули гIурра даршдусмазиб калаби. АхIерти хIянчизартасра чIумаси арадеш булгулра, бугабикIаб хIушала кьалам! БусягIятла манзиллизир бекI редакторла къуллукъуни дузахъуси БяхIяммадов Рабадан Рашидовичлисра гьамадси ахIенси хIянчилизир сабур, цIакь ва имканти дулгулра.