Даршлим шел дусла гIямру
Гьанна сунни деркIибси,
Азиралра биркIайзиб
Даргантала бучIуси.

Се буриша хIечила,
Гьанна нуни газета?
Диркулигу дахъ хъярхъли
БурхIни хIела «Замана».

Дигиличил бучIуси
Сабригу хIу «Замана»,
Шадли хьурабирулри
Гьар юртлизи даргала.

ХIезив дарган цаирул
Хабурти цахIнадирхъул,
Дубурлантала диги
Давлализи халбирул.

«Замана»-ла агьлулис
Дигулра «Дерхъаб!» дарес,
Гьарил ганз баркьудила
Гьарбизурси биахъес.

Пахрубирулра нуни
ХIу даргантас лебнилис,
Даршлим шел деркIи хьал­ли,
Жагьли даим калнилис.
Бархьаначи бурасли, газеталичил дила гIямру иш­кьяйдали цIакьли дархдалсниличила нуни балуси ахIенри. Дагъиста пачалихъла университетлизи ру­чIес карерхурхIели, газетализир рузес ибси пикри аги. КIиэсил курсличир ручIухIели нушала дарган мезла преподаватель Муса Расуловичли сочинение бел­кIахъес хъарбарибсири. Сегъуна темаличила саб­ри ил гьанна гьанбиркули ахIен. Муса Расуловичлис белкI гIяхIбизурли, газетализи кабяхъес пикри агарав или хьарбаибсири. Кабяхъес вирули гIергъи сен ка­хIе­бирхъяхъуси или кьабулрикира. ИлхIели бекI редак­торли рузуси Салимат ГIялиевани кадяхъес дигути бел­кIа­ни лерли диалли, нушачи дурхьен или багьахъур.
Ила макьалаби дурхьутири набчил варх учIуси Мя­хIяммадшапи Матаевлира. Камси замана бикили гIергъи, редакциялизиб макьалаби лукIес балути жагьилти гIягIнибикиб. ИлхIели илав 0,25 ставкаличив узуси М.Матаевлира набзи буриб рахли макьалаби лукIес иш­тяхI лебли биалли, хIура рузес рируд или. ИлхIели, бел­чIудиличил цазаманализив узесра бажардивиркуси виалли, нура рузес рирус или пикрибарира. Салимат ГIя­лиевани ну хIянчиличи руцира. БегI гьалаб бакIибси ала­паличи сецад камси биалра, (2000 къуруш) ну разирикира. ВегIла белкIанзибадра дигахъуси саби башуси алапа­ла кьадарра или бурибхIели, гьатIира зумали лукIес рехI­ри­хьира. Илкьяйдали гьаргбиубсири наб газетализи гьуни.
Ахирличиб бурес дигулра, гIямрулизир сегъунти-диалра къапу гьаргдиубли диалли, урехиагарли, ила айцIен. АдхIецIили виадли пашманируд, сенахIенну къапула гIелаб хIед дигуси, хIуни барес балуси секIал къаршибикес асубирар. АцIили гIяхIхIебизалли, дуравхъес вируд. Халкьли буруливан: «АхтардихIебарили – багьес хIейрар!» Илкьяйдали нунира ахтардихIебарили риасри, ишцад цIакьли газета ва илаб бируси хIянчи дигахъни хIебаласи.