Гьар дус имцIабикIаб!
Галгала цIакь-мякьазиб сабливан, гьарил миллатла халкьла цIакьра хала бегIтала культурализиб, гIядатуназиб ва нешла мезлизиб саби. Даргантала культура ва дугьбала хазна мяхIкамдирули, илди гьатIира жагадарес, гьаладяхI дашахъес бузули саби нушала мезли дурабулхъуси республикала «Замана» газетала коллектив. «Замана»-личил ну акIубхIейчирад тянишсира рикIасра хатIахIериркус. Нушала хъулир даргала мезли дурадулхъути лерил газетаби-журналти ну риштIахIейчирад дири. Азбука- букварь някъла касили бара xIурпри дагьурxIeйчирад, хала нешла тилади хIясибли нуни газетабазирад макьалабира ахъли дучIутири. Багьла-багьлали иларти назмурти дучIес набра дигиаур.
Филологияла факультетлизир ручIухIели, газетализиб бузутачил, пергер белкIанала автортачил тянишриэс имканбакIибсири. ИлхIели дила разидешлис ахир аги. Илала гIергъи чуйнара редакциялизи гIяхIладли рякьунра. РучIесцунра ахIи, лукIесра иштяхI акIуб. ГIурра чумра дарган бургар «Замана» газетала малхIямси, балгунси коллективли нешла мезла белкIаначи набзирван диги имцIадарибти.
1921 ибил дуслизиб дурабухъунси газетали хIера, гьанна 105 дусла ганзухъ ихъули саби. ПасихIкарти белкIаначил, духути пикрумачил газета хIядурбирути, нешла мезличи даргантала диги имцIадирути «Замана»-ла хIянчизарти юбилейличил уркIи-уркIилабад мубаракбирулра. Мурталра сархибдешунира, гьарбизунирацун дираб!
Ассаламу гIялайкум
Агьлу редакцияла,
Дила уркIилис дигул
Коллектив «Заманала».
Дарганти гIеббурцули
Макьалаби лукIанти,
Калаба детурхули
Кьасани уркIиларти.
Нешла мез ахъдурцули
Гьарил бархIи дузанти,
ХIуша шадли, арали
Аллагьли хIердарарти.
ПасихIкар мухбиртала
Кьаламти дугадикIаб!
Газета бучIантала
ЛугIи гьар дус ахъбикIаб!