ВатIа чебла ахъили,
Чарулхъан уршиличи
Гьалаксаурси нешван,
«Замана», нура хIечи
ХIерсира гьар замана.

Набван хIу ахIерсири
Даргала гIяламлисра,
«ГIялимри» — дарган мезла
«МугIяллимри» —дурхIн­ас­ра,
Дигулри лебтасалра.

ГIяхIти хабурти хили
ГIялам разибиридра,
Белкъайчи рухIла давла
Гьала тIинтIкабиридра,
Дагьрили лукъахъадра.

Башули гьарил хъули,
Даршлим шел дус биубри,
Даршал азир дус гIурра,
Дарга чебяхIбирули,
Башаби хIебумсули.

ХъумхIертахъидра хIуни
Гьаб-убла гIяхIти гъубзни,
ВатIайс жан дедибтира
Дунъя берцахъибтира,
Хабарла игит халкьра.

ХIед дезахIейкIул дарган
Дарган ахIен рикIулра,
ХIу хIебашуси хъулиб
ХIебирар баракатра,
ХIебирар хIулбукIрира.

Рулгулра хIед акIубла,
ДаршдехI дусмазиб гIурра
Даршал азирла хъули,
Башен кьанхIебиубли,
Дарганти ахъбурцули.

Башули ши-шимази
Даршлим шел дус биубри,
Гьарил дарганна хъулиб
Давла имцIабирули,
Берхъаби, ахъбикIаби.