Ну «Замана» газеталичил тя­ниш­риубсири риштIали ле­рай. ИтхIели ил газета къул­басбирусири дила нешли. Га­зетализир делкIунти дар­гала ли­тературный мезличилти бел­кIа­ни дучIули, илди гIерисули, пагьмучебти лукIантала ма­кьалабачил тянишрирусири. Ил­хIели дила пикрилизибра хIебири ил газетала коллективличил тянишдеш барес бетарар ва ил газетализир дила белкIани дурадулхъан или.
Ну Ахъушала шилизибси «Бархьдешла гьуни» газетала редакциялизир рузес рехIрихьибсира 2011 ибил дусличирад. Нуни илис гьалар макьалабира лукIули хIе­рираси. Районна ре­дакциялизи ра­кIиб­хIели, нуни камти бел­­кIани лу­кIули, бузерила гьуни бехI­би­­хьира.
«Бархьдешла гьуни» газетала редактор ПатIимат Маллаевани, «Замана» газетала хIянчизартани лукIути мурхьси мягIнала дахъал макьалаби дучIули, илди компьютерличир луцIули, гIерисули нура лукIес бурсикариубра. Гьанбушес дигулра ну редакциялизир кIел дус ца кабинетлизир рузули калунра пагьмучевси поэт, лукIан Насруллагь ГIямаровличил рарх, бу­нагь-хатIа урдуцаб сунела. Дебали бархьдеш дигуси, хIялалси, бахълис гIибратли ветаурси адам сайри ил. Макьала лукIухIели, ну­ни хIебалуси секIал малхIямли гIеб­бури. Пагь­мучебти МяхIяммад ГIяб­дул­­лаев­лара (Писки-МяхI), Насруллагь ГIя­ма­­ровлара дахъал назмурти дурадулхъу­ли дири «Замана» газетализирра, илдира иштяхIличил дучIес дигути­ри наб.
Районна газетализи лукIу­ли хьалли, нуни макьалаби «За­мана» газетализи дурхьули хIерираси. Ахъушала районна судла председательли узули калунси ГIябдуллаев МяхIяммад НурмяхIяммадовичли сунела кабинетлизир гьаман школабала бучIантачил гьунибаъниби дурадуркIутири. Илди гьунибаънибачила, бучIантачил детурхути ихтилатуначила бел­кIани дирахъес нура рикусири. ИлхIели буриб МяхIяммад НурмяхIяммадовичли:
– Сен хIуни «Замана» газе­тализи хIедурхьулрив хIела бел­кIани, ихара дурхьен, рес­публикала кьадрила, ахъси даражала, Дагъистайзирти лерилра даргала район­тала халкьли бучIуси саби ил газета или. Ил­хIей­чирад макьалаби дурхьули, нура «Замана» газета­личил бархбас бузахъес рехI­ри­хьиб­сири.
Чумал дус гьалаб нушала редакциялизи гIяхI­ладли бакIибтири хIур­матла, пагьмучебти гIяхIли, «За­мана» газетала редакторли рузули калунси Салимат ГIялиевара, ПатIимат Кьурбановара, Дагъиста халкьла поэтесса Аминат ГIябдулманаповачил барх.
Илди пагьмучебти, мал­хIямли, пасихI­чебли гъай­би­кIути адамтачил ну тяниш­риуб­сири ва илдачила гIяхIси пик­ри акIубсири. ГIурра илдачил къарши­ри­кили ихтилатрикIес дигахъаси или гьанбиркули бирар. Илкьяйдали, их­тилатрикIес хIяздулхъули дирар «За­мана» газетала хIянчизар, малхIямли гъайрикIуси, дахъал белкIани дурадулхъуси, бусягIятла замана редакторла заместительли рузуси ПатIимат Сулайбановачилра. ПатIиматличил ну телефонна бархбасличил сарра гьачамлис тянишси.
Дила белкIани жагали кадирхънилис баркалла багьахъес дигулра.
Лебилра «Замана» газетала коллектив бусягIят бузули лебтира, гьанналауб бузули калунтира чула газетала юбилейличил мубаракбирулра! Чархлизиб арадеш, гIямрулизир ва бузерилизир сархибдешуни, коллективла-ургаб балгундешра, мардешра, дигира, гьалмагъдешра имцIадикIаб! Чула дигутани разибирули хIербиэс кьадарбиахъаб Аллагьли!