ХIера, ну «Замана» газетализив узухIейчивад 3 дус диркули сари. Илди 3 дусла духIнар жура-журала иштяхIдухъести ва уркIилизир даимлис калунти анцIбукьуни детерхур.
Ну газетализи вакIибхIели назмурти, хабурти лукIес бурсивиубра. Бахъал хIурматла адамтачил тянишвиубра. Иш лугIи гIуррара имцIабарес вирар. Амма иш макьалализирти гъай дила сархибдешуначила ахIенну, дарган мезличил дурабулхъуси Дагъистан Республикала жамигIятла ва политикала «Замана» газеталичила сари. СенахIенну ишди бурхIназиб илала цаибил номер дурабухъунхIейчирад 105 дус диркули сари.
«Замана» газетала тарих дебали халаси саби. Ил тарих ца макьалализицун кабарцахъесра хIейрар. Илаб сагати хIянчизарти имцIабикIули саби. ДелчIес иштяхIдухъести макьалаби дахъдикIули сари.
Дила макьалализиб ну сен-сен газетализи узес вакIибсирал ва набчил сегъунти анцIбукьуни кадикибал бурес дигулра.
Дила цаибси макьала белкIунхIели ну шакалра виркули ахIенри сегъуна гIяхIси ва разиси редакциялизи вакIилрил ну ва сецадла тамашала санигIят сабрил журналистла. Дила цаибил макьала «Мез мяхIкамли калахъес» ибси уличил, 2022 ибил дусла 48 ибил номерлизиб дурабухъунсири. Ил ДГУ-ла филологияла факультетлизиб «Гьалмагъдеш» журнал акIахъубхIейчирад 70 дус дикнила дазурбазиб журналла редактор Кьади ГIялисултIановличил дураберкIибси гьунибаънилис багъишлабарибсири. ИтхIели дила мугIяллим, профессор Муса Расуловичли набзиб ил лами ахIебикьурси биалри, хIебалас се бетарусирил…
Ил гьунибаъниличила биштIаси белкI барили Муса Расуловичлизи бедира. Илис ил дебали гIяхIбизур ва «Замана» газетализи бархьибсири.
ГIур илис гIергъи гьарил бетурхуси гьунибаъниличила нуни макьала лукIусири. Амма илди белкIани дархьес дила я электронный почта, я чидил-биалра хIянчизарла номер аги. ИлхIели Муса Расуловичли набзи илар рузуси Салимат ГIялиевала номер гибсири ва редакцияла адресра бурибсири.
Ну ила ваира. Газета 8-ибил дерхIличибри. Лифтличив ила ацIира. БегI гьалабси кабинетлизив бара гьалавван филфакла студентуначил гьуниваибси ХIяжимурад Ражабов къаршиикиб. Иличил ихтилатра барили илабти хIянчизартала кумекличибли Салимат кариибси кабинет баргира. ИтхIели Салиматли бекI редакторла заместительла къулллукъ бузахъулри. Ил наб разили ва дяхI шалали гьунираиб. Дила белкIанира сасили ну илав узахъес маслигIятбариб. Илини набзи газетала низам-кьяйдаличила буриб.
Ну итхIели вирусара илгъуна хIянчи бузахъес, дурсрачира вашули, хIянчилара вашес бажардивиркусара или ташмишвиубсири.
Байхъала дус дикили гIергъи чарухъунра. ИтхIели газеталис бекIдеш дируси Арсен Гъази­мяхIяммадович Юсупов сагали акIахъубси «Дагъистан» «Этномедиахолдингла руководительла къул­лукъличи шурухъири, ва Салиматли газеталис бекIдеш дирулри.
Сентябрьла 12-личив ну хIянчила уцибсири. Бархьаначи бурасли, ну газетализи вакIили узниличи гьачамалра пашманхIейубра. Наб гьанна ил газетала хIянчизарти хъалибаргван билзули саби.
ХIера, ну узути 3 дусла духIнар дила дурадухъунти белкIанала лугIи 100-личи абикиб. Илди «Замана»-лизирцун ахIенну, гIергъити изданиебазирра дурадулхъули сари: Дахадаевла районна «Шила гIямру» газетализир, «Гьалмагъдеш» журналлизир, дурхIнас хасбарибси «Лачин» журналлизир, Сергокъалала районна «Эркиндеш» ва динна «Ас-Салам» газетабазир.
Баркалла багьахъес дигулра ну гIевуцибти дила бегIтас, дила мугIяллим ва ил гьуни чебаахъибси профессор Муса БяхIяммадовлис, илкьяйдали «Замана» газетала уржибси агьлулис.
Берхъаби, ахIерси «Замана»!