Къаякентла районна Пер­вомайское ши­лизибадси С.БяхIяммаев­ла уличилси гимназиялизиб руркъянтани, 13 дус хIебиубти дурхIни-ургабси «Кабцла тап — школабала футболла Лига» бикIуси Россияла абзлизиб чедибдеш сархиб.
Нушала улкала 52 мер-мусаличирад дакIибти, футболла хIяз дигантала 80 цIакьтигъунти кьукья Москва шагьарлизир къаршидикибтири.
БекIлибиубси гьунибаънилизиб Первомайсклизибадси команда Башкортостан Республикализибадси Октябрьский шагьарлизибадси кьукьяличил бястбикIусири. Нушала дурхIнани 4:2 счетличил чедибдеш сархиб.
ДурхIнас абзличи букьесра халаси ва мягIничебси баркьудири: самолетличиб бегI гьалаб арцес, Москва шагьарлизи хьурабиэс, «Лужники» бикIуси майдайчиб хIяз дураберкIес. ХIера, илаб чедибдеш сархесра бикни илдас гьарли-марси шадлихъли бетаур.
Спортсментас хасдарибти шабагъатунира Дагъистайзи дакIиб. МяхIяммад НурбяхIяммаев вегIлара гIяхIси вратарьлизи халвариб, Шамил Ражабов — командализив гIяхIси хIязли виркьаннизи.
Первомайскла гимназияла директор Руслан Мажидовли ишкьяйда сунела пикри буриб: «Нуша цаибти сарра. Ил барес имканбакIиб гьанна шуибил дус дурабуркIуси абзлизиб. Нуша дебали разилира нушала спортсментани чедибдеш сархниличи. Дигулра дурхIнала илдигъунти сархибдешуни гьаннала гIергъи имцIадиубли».
Ишдуслизиб «Кабцла тап» бикIуси абзлизир, илала декIар-декIарти бутI­назир, 280 азир школализибадти бучIан­тани бутIакьяндеш дариб.
Чедибдеш сархибтас аэропортлизиб бахъал адамти ва чула гъамти разидешличил гьунибаиб. Ил анцIбукьли дурхIнала уркIбазира пахрула хIялани минадариб. Командала тренер Камил НухIов цалабикибтала гьалав гъайухъун. Ил чедибдеш сархес хIейри лебилра тренертала кьукьяли уржибси хIянчи хIебарибси биалри или багьахъур. Кьурбан ГIябдулмажидовлис, Рабазан Рабазановлис, МяхIяммад МуртазагIялиевлис, илкьяйдали хIядурдеш барахъес икьалабарибти АрслангIяли МяхIям­мадзапировлис ва ГIяликьурбан ГIусмановлис, дурхIнас ва илдала бегIтас халаси баркалла багьахъур. Москва шагьарлизиб хIербирути чула шанти ва дагъистанланти гьанбушиб. Илданира дурхIни гIеббуцибтири, тренировкабачи ва абзаначи башутири.
Къаякентла районна бекI МяхIяммад Мажидович Эльдерхановли призерти бетаалли дурхIнас гIяхIси савгъат бирис или гъай бедибсири ва, сунела гъай марбирули, илдас байрамла кьумур баршиб. Илини дурхIнала сархибдешлис чихъси кьимат бедиб. Дагъистайзибадси кьукья цаэсил саби Россияла чемпионатличиб цаибси мерличи лайикьбикибси. Ил команда шилизибад биъни гьатIира халаси пахру саби.
МяхIяммад Мажидовичли дурхIнас ва илдала тренертас I-Pad планшетуни, грамотаби ва ил анцIбукь муртлисалра гьанбиркахъес статуэткаби дедиб. Дагъистан Республикала багьудила ва гIилмула министрла къуллукъуни заманалис дузахъуси ЯхIъя Бучаевли ва РДЮСШ ГБУ-ла руководитель Александр Маркаровли дурхIнас форма, тапани, рюкзакуни ва Баркаллала кагъурти дедиб.
Иличирли гIяхIти хабурти таманхIедиуб. ДурхIни бучIуси гимназиялизи Москва шагьарлизибад гIяхIли бакIиб. «Школализиб футбол» бикIуси балбуцла амбассадорти, Россияла чемпион Дмитрий Сенников ва урхьула дублаб тапла хIязли биркьнила шайчивси дунъяла чемпион Борис Никоноров Россияла Футболла Союзла вакилтачил барх дурхIначил ва илдала бегIтачил гьунибаиб. Илдани дурхIнани сархибси савгъат — бегIла гIергъиси журала халаси телевизор-компьютер — кабухиб. Ил белчIудилис хасбарибси саби.
Илкьяйдали илдани цахIнабикибтала суалтас жавабтира дедиб. КIинайс футболлис хасбарибси авлахъличир чула устадеш чедаахъиб. Ахирличир суратуни касиб ва автографуни дедиб.