Ишди бурхIназиб Дагъиста жузала Издательстволизиб нушала рахъхIила гьалмагъ, Дагъиста халкьла поэтесса Аминат ГIябдулманаповала урус мезли «Избранное» бикIуси сагаси жуз дурабухъун.
Илизир лер 380 бяхI. Авторли сунела жуз бехIбихьили сари Москвала литературала институтла преподаватель-поэтла гьалагъайличибад. Ил сай РФ-ла Правительствола ва хIукуматла премиябала лауреат Владимир Иванович Фирсов. Илини Аминатла назмурти чихъли кьиматладирули сай.
Жуз цалабикили саби 10 бутIа­ли­­зибад: «Пагьму алкни», «Нушала гIям­ру — Батирайла да­­луйтазир», «Беб­кIа­агардеш­лизи ганз», «УркIилизир къел-хIерзи», «Кьисматлис рулгулра» ва цархIилтира. Илдази кадерхурли сари поэтла декIар-декIарти темабас хасдарибти назмурти. Илди урус мезличи шурдатур урусла бегIлара чеббикIибти поэтуни-тилмажунани: Валерий Латынинни (Москва), Марина Колюбакинани (Дагъистан), Юрий Щербаковли (Астрахань) ва цархIилтани.
Газетала шайзирад Аминат ГIябдулманапова илгъуна жуз дураъниличил мубаракрирулра, гьатIира жузи далкьарахъес ва даргантачи диахъес Кьудратла ВегIли чIумаси арадешра ахърира дедаб или дулгулра.