Социальный бяхI­чи­биз­лизиб адамти гIеб­бурцнила «Ветеран» би­кIуси Юртлизиб «Мал­хIямти някъби» Центрли хIядур­ба­рибси гьунибаъни бетерхур. Илизир бутIакьяндеш дариб ДР-ла Жа­ми­гIятла палатала член Зуль­фия Ильясовани. ГIяхIли, гьар дусла гIядат даимбирули, уч­реж­де­­ниелизибти гьести гIямрула адам­тачи гьаббакIиб.
Ишдуслизиб гьунибаъни хаслира мягIничебси сабри. Дус гьалар гIямрулизирад шал­гIер­ру­хъунсири ДР-ла шайчибси «Россияла не­шани» бикIуси хIяракатла председатель ва Дмитрий Цаурла неш Таиса Билаловна Мя­хIяммадова. ДекIар-декIарти дусмазир Т.МяхIяммадова ДР-ла ЖамигIятла палатала членни рирусири ва регионна жамигIятла гIямрулизир жигарла бутIакьяндеш дирутири. Ил сарира рашусири илдигъунти архIябачи, ветерантала Юртлизиб хIербирутачи халаси пик­ри бяхIчииули. Гьунибаънила бутIакьянчибанира илини бехI­бу­цибси хIерудила ва уркIе­цIи­ла гIядат даимбарили бирар или багьахъур.
Зульфия Ильясовани, гьести гIямрула адамтала гьалар гъайрулхъули, халатала наслула хIурматбирнила, адамдеш кьиматладирнила, халкь цалабирхъути гIяхIти гIядатуни дузахънила мягIничебдешличила аргъахъиб.
Дагъистан Республикала халкьла гIяртистка ва Ингушетияла Республикала рурибси гIяр­­тистка З.Ильясовала, илкьяй­дали пачалихъла Дагъиста фи­лар­мо­нияла гIяртистунала бу­тIа­кьян­деш­личил бетерхурси концертла программали цалабикибтала уркIила гьав ахъбуциб.
Илдигъунти далдуцунани гIя­датлати, амма дебали мягI­ни­черти давлумачила, пик­ру­ми-хIераначила, хIурмат­бир­ни­личила гьанбиркахъули саби. Ил­ди гIяхIти баркьудлуми сари адамдешла хьулчни.