Нуша дахъал дерхIанар юртлизир хIердирутира. БиштIаси махьилизибцад халкь хIербируси юртла адамти лебилра цалис ца унруби бетаурли саби. Гьарахъти узи-уршиличиб мякьлабти унруби имцIали багалабирар бикIутира ца ити ахIен.
Избербашла дурхIнала 7-ибил анхълизир заведующаяла заместительли рузуси, гIяхIти хIял-тIабигIятла, духуси, бузерилизир азгъиндеш хIедалуси, унрубачил ралгунси БяхIяммадова Зугьра Запировнара адамла мурад барес гьалактазирад цаибси сари.
ВецIал дус гьалаб нушала унраличи бакIибхIели, Сергокъалализирадси Зугьра БяхIяммадовала сакIубти, биштIати хIябал урши лебри. Шакра хIедикили, илди халакабаиб. БусягIят илди жагьилкабизурти уршби — бегIтала ва саби балутала пахру саби. Халалгъуна урши Заур БяхIяммадов мургьила медальличил школара таманаили, Рязаньнизибси медуниверситетла 5-ибил курсла студент сай; СягIидлира гIяхIти кьиматуначил  школа таманаиб ва ДГУ-лизи керхес хIядурикIули сай. Илис спортра дигахъу. Руслан биалли, школализив 7-ибил класслизив учIули левал. Амма ил камти гIямруличив спортлизир гIяхIцад чедибдешуни сархес бажардиикили сай. Ил Россияла ва Европала чемпион ветаур. Илала хъали шабагъатлис дедибти медальтани ва кубокунани баршили саби.
Гьаман Интернетла сайтличир Русла сархибдешуни чедиули, унрубазирад серхурси уршиличила хабурти дикьули, нушала газета бучIантазира Избербашлизив хIерируси, Сергокъалализивадси хIурхъан уршиличила багьахъес, илала чедибдешуначила белкIес пикрибарира.
Дагъистайзир ва Россиялизир гьаларти мерани дуцили гIергъи, Руслан БяхIяммадов Европала UWW-ла грэпплингла Гьалабдеш багьанданти абзанала чемпион ветаур. 
Серхурси унра урши Руслан, хIед спортлизир гIуррара сархибдешуни дираб! Мурталра гьалавяхI вашули, гIямру деркIаби!