Ишдуслизиб «Замана» газетали сунела юбилей дурабуркIниличила багьурхIели, иличилти дила бегI гьалати тянишдеш гьандикиб. Илди дила школала гIямрула дусми сарри. ИлхIели нуни балусирира мурт-биалра газетала коллективличил гьалмагъриркниличила? Илдигъунти пикруми бекIлизилра хIедакIиб.
Дахадаевла районна Кьункьила шилизибси школализир ручIухIели, дила пикрили, 5-ибил яра 6-ибил класслизир сарри, 1965 ибил дуслизиб нуни бегI гьалаб «Леннина байрахъ» бикIуси газета някълизи касибсири (дудешли кабухибси), ва илхIейчирад ил баткахIеира. Ил газетализибад сабри нуни багьурси МяхIячкъалализиб «Дубурлан рурсбас хасбарибси интернат» лебниличила, илкьяйдали – III-ибил интернационала уличилси фабрикала гьалабси шагьарла санигIятлашалси техническое 8-ибил училищеличилара (ГПТУ №8).
9-ибил класс тамаили, ну «Дубурлан рурсбас хасбарибси интернатлизиб» белчIуди даимбарес шагьарлизи ракIира. Сепайда, кьанриубра. Гьанна нуша-ургав мицIирли агарси, ЧебяхIси ВатIа дергъла бутIакьянчи, дудешла узини дила документуни ГПТУ-лизи дедили дуилри, чIянкIи душанна санигIят касахъес. Илар ручIухIелира нуни газеталичила хъумуртуси ахIенри. Директорли республикала лерилра газетаби къулбасдирутири ва хIунтIена гIямзилар илди мяхIкамли дихIутири. Нуша рурсбани биалли, илди дучIутири. Училище хъараахъурли, чIянкIи душанни рузес рехIрихьибхIели, нуни къулбасдирес­кариира республикала лерилра газетаби-журналти, ил баркьуди тикрарбарахъес дарган рурсбазира маслигIятбирусири. Илкьяйдали нуни районна «Шила гIямру» газетара къулбасбирусири.
Бузерилизир гIяхIцад сархибдешуни диахъни багьандан, цархIилти насихIятчибачил дарх нуша телевидениелизи, радиолизи жидирутири. Илар сарри ну бегI гьалар Ф.ГIялиевачил ва нушала республикала машгьурти бахъалгъунти адамтачил тянишриубсира. Набчила цаибси макьала багьарбиубсири «Дагестанская правда»-лизиб. Ил кабяхъибсири журналист Ю.Ваниковли. Ну бузерилизир гьаркьянали ретаурси дарган рурси риъниличила багьурхIели, цархIилти журналистунира ихтилат дураберкIес башули бири. ХIера, илхIейчирад чумра макьала дурадухъун газетабазир.
Дусличи-дус газетализир дурадулхъути макьалаби дучIули, хIердирули, багьла-багьлали нура лукIес рехIрихьира, белчIунси белкIла черкад дила пикруми дурули. Илкьяйдали бархIиличи-бархIи дила газеталичилти юлдашдеш дебадикIули сари. Илаб бузути хIянчизартачил рархра ну гьалмагърикира. Нуни ункъли балути Запир Харбилов, МяхIяммад Рабаданов, Ражаб Адамадзиев, ГIиса ТIагьиров гьанна мицIирли агара. Чула бунагь-хатIа уркадуц, дебали пагьмучебти журналистуни бири. ИшбархIира газетализиб бузути ПатIимат Кьурбанова, Муъминат Хаттаева, ПатIимат Казимова, Салимат ГIялиева ва цархIилтира хIянчизарти нуни ункъли балас, редакциялизи гьарракIибхIели, илдачил ихтилатрикIес иштяхIдулхъан. ГIяхIси коллектив хIечи хIурматличил дугьабилзухIели, хIела пикрумачи лехIирхъухIели, иличибра дунъяличиб гIур кьиматласи секIал агархIеливан кабилзан.
1990-ибти дусмачибад газетали сунела у барсбариб, гьанна ил «Замана» саби. Гьайгьайрагу, газеталичила лерилра лукIасли, илала бяхIяназиб мер хIебиур. Амма иличила нуни гIяхIси ахIи, селра вайси белкIес хIерирус. Устадеш лерти журналистунани балкьарахъуси, даргала рухIли бетаурси газета цархIилтанира гIеббурцули, мурталра гьалабяхI башули дигулра! Уржибси коллективлис биалли, халаси баркалла багьахъес дигулра мурталра дяхI шалали гьунибиънилис. ХIушаб бузерилизир гьарбизуни, пагьмулашалти сархибдешуни, арадеш, хъулиб баракат, даршути гIямру дулгулра!