Сергокъалала районна бекI Арсен МяхIяммадов СВО-ла бутIакьянчи Расул ГIялисултIановла дудешличил гьуниваиб ва ванзала хIекьлизибси сертификат бедиб. Документ хIясибли матъал ванза касили, юрт барес имканбикIули саби. Ил биалли, гIярмиялизиб къуллукъбирутала ва илдала хъалибаргунала гIямру-яшавла шуртIри гIердурцуси тяхIяр саби, сабира улкала Президентла хъарбаркьунала дазурбазиб бетурхахъуси.
Уршилис гIяхIси бяркъ беднилис ва илизир ВатIайчи диги адикьнилис ургъанна дудешлис баркалла багьахъур А.МяхIяммадовли гьунибаъниличиб. Илкьяйдали Сергокъалала районна администрацияли гьаннала гIергъира дявила хасси балбуцла бутIакьянчибала хъалибаргуни гIеббурцнила масъулти сунела хIерудилиур дихIниличила багьахъур илини.