Нушала дубурлан кегIебти рурсбачи хIерикIухIели, илдала жагадешли алавчарси дунъяра шалабирусиван кабилзан. Гьарли-марли, чина укьялра ва чинаб жагьти рурсби чебаалра, нушала Дагъиставан жагати чехьериби агара кьалли или пикри алкIули саби.
ГIе, гьайгьайрагу, гIергъити дусмазир дагъистанлан рурсбала вяшатIай тамашавирахъули сай: кIунтIуби халадиахъули, къянкъуби ва дяхI-сипат дарсдирахъули бехIкабихьибхIели. Илди аварали жагадеш имцIадирули сари викIесра хIейрар, гьатIиралра илди начурбачи мешутили кабилзахъули саби.
Амма гьарли-марли Кьудратла ВегIли бедибси жагадеш бихIути исбагьиби леб нушала. КегIебти чарх-бекIличи далдикибти, ишхIелла «модала» диалра, илдази гьар-урла халкьла някьиш яра кам-гьамти лишанти гъудурдарили далкьаахъурти пергер палтарли бегIбиубли, гюльменди кIана чекабуцибти дубурлан исбагьибачил картинабазиб сипатбирути цалра дурала улкнала хьунул адам цугбуцес хIейрар или гьанбиркули саби наб. Илгъуна дубурлан рурсила кабизлизир итмаданал чедиур Дубуртар Улкала пасихIкартала бяркъ, гIякьлу, асилдеш.
Хьунул адамла гьарил баркьудилизиб, девлизиб малхIямдеш ва жагадеш чедиур. Ил багьандан дахъал сари нушала поэтуни-писательтани дубурлан рурсбас хасдарили делкIунти произведениеби. Илдазир исбагьила хIял-тIабигIятличил дарх сипатдирули сари мурул адамталайчил цугти гъабзадешра. Илдас мисалтира лер, илдачила гьанхIебушалра.
Наб бурес дигуси: жагадешла лишан сар­ливан иш шалал дунъяличир дакIуриубси хьунул адамли, хаслира – дубурлан чехьерили, сунела гьарли-мар­ти, Че­вяхI­сини де­дибти ке­гIеб­­дешра жа­гадешра мяхI­­камли ди­хIес гIягIнили сари, лутIи-хьул­чи­лизирад куц-сипат дарс­хIе­дирули ва ки­нолизибти гIяр­тис­туначи мешурикес къайгъна­хIериркьули.