Ахъушала районна куль­­турала управ­ле­ние­­лизиб гIяхIцад дус­мазиб чула бузерила гьуни даим­би­рули, мардешличил бузути ба­хъал хIянчизарти леб: илди-ургаб гьанбушес дигулра ПатIимат ГIя­ма­ро­ва, кассир Зубайдат Будунова ва костюмерша СухIянат Маллаева.
ПатIимат ГIямарова ва Зубайдат Будунова 32 дус барх ца кабинетлизиб бузули саби, балгундешличил, цали цала хатир кахIелахъи, хIурматбирули, чули касибси санигIятлис мардешличил.
ПатIимат ГIямарова дебали пагьмучерси, гIяхIил бухгалтерия балуси хIянчизар сари. Илар рузес рехIрихьибхIейчирад чум руководитель барсбарили биаллира, лебтачилра ралрикили, рузес балуси, гIяхIти хIял-тIабигIятла, пасихIчерси хьунул адам сари ил.
ПатIиматличи ва Зубайдатличи чидил хIянчизар жура-журала суалтачил дугьавизалра, малхIямли, хIебалуси секIал аргъесли бурили, уркIи паргъатбиахъубли бурхьути саби. Гьачамалра чучи гIяйибли хIянчизартала алапа кьанхIебиахъуб илдани.
Сагали кабиибти хIянчизарти гIеббурцули саби илдани. Илкьяйдали, нура шел дус илди пасихI­чеб­ти хьунул адамтачил рарх рузес кьадарбиуб. Ну культурала КIялгIялизир халкьла пагьмуртала Юртла преподавательли рузахъес каратурхIели, компьютерличир рузес къиянбулхъусири. ПатIимат ГIямаровани комьютерла хIянчи гIяхIли бяркъурлири, чуйнара набзи гIеббуриб иличи бурсириахъес. Илдас сагали катурси хIянчизарли сунечи хъарси хIянчи чебетаахъили бирахъес бурсивиубли дигулири.
Нуни лебилра культурала управлениела хIянчизартас справкаби лукIес гIягIнитири: хутIлис, газлис, цIабикьалалис льготабала арц дашахъес багьандан. ПатIиматли ва Зубайдатли илди справкаби лукIахъесра, илала дурарад, цархIилтира алапала шайчирти справкаби бекIдирахъес ва гIуррара наб гIямрулизир, бузерилизир манпагIятдиэсти секIайчи бурсирарира.
ПатIимат ГIямаровани культу­ра­ла управлениелизир рузес рехI­рихьайчи районна адамти хIян­чи­личил гIеббурцуси Центрлизибра шел дус бухгалтерла хIянчи барибсири.
Сунела гIямрула вархкья ХIу­сей­чил барх уршира-рурсира абикьурли, гIяхIси бяркъра бедили, чебяхIси даражала багьудира касахъили, гIямрула гьунчи дураиб. Урши Камил – культурала управлениелизив узули сай, илала гIямрула рархкья Сабият библиотекализир рузули сари. Камилли ва Сабиятли леб абилкьули хIябал урши. ПатIиматла рурси Хадижат – Централизованная библиотекализир багьудила отделла заведующаяли рузули сари. Хадижат гьалар культурала Юртлизир рузулира калунсири. Илалара гьанна 22 дус бузерила стаж абикили саби, гIяхIти хIял-тIабигIятла, къугъати чарх-бекIла регI сари Хадижат. Илалара леб гьанна сунела гIямрула вархкьячил барх абилкьули урши ва рурси.
Зубайдат Будунованира сунела гIямрула вархкья ГIябдул-Халикьличил барх хIябал рурси абикьур, гIяхIси бяркъра бедили, гIямрула гьунчи дураили саби. Зубайдатла хIябалра рурси Раисат, Хамис ва Разият цаличиб ца гIяхIти уркIи-хIялла, жагати чарх-бекIла бегIти саби. Хамис — библиотекализир, Разият районна больницализир медсестрали бузули саби.
ПатIимат ГIямарова ва Зубайдат Будунова дахъал дусмазиб чучи хъарси хIянчи чебетаахъили, жавабкардешличил бетурхахънилис чуйнара районна администрацияла шайзибад ХIурматла Грамотабачи лайикьбикили саби.Культурала управлениела хIянчизартала ва шила халкьла-ургаб халаси хIурматра сархили хIербирули саби илди.
СухIянат Маллаевара сунечи хъарси хIянчи чебетаахъили даимбарес къайгъилизир рирар. Культурала хIянчизарти жура-журала байрумтачи ва фестивальтачи букьес гIягIнили биалли, яра культурала КIялгIялизир детурхути шадлихъуни диаллира гIяртистунала палтар далдикахъили мурталра хIядурли диахъес бажардириркули сари.
СухIянат гIяхIси палтарла устара сари. Сунела гIямрула вархкья, дахъал дусмазив районна администрацияла экономикала отделлизиб жавабкардешличил хIянчи бируси Шамилличил урши айкьурли, чебяхIси даражала багьудира касахъили, гIямрула гьунчи дураиб. Илдала урши Мурад гьанна районна духIнарти къуллукъунала отделла хIянчизар сай. Мурадлира сунела гIямрула рархкья, тухтурли рузуси, жагаси Загьидатличил барх леб абилкьули хIябал урши-рурси. Гьанна биалли СухIянатра Шамилра чула уршила дурхIни абикьахъес, илдас манпагIяттили биэс, гIяхIси бяркъ бедес къайгъилизиб саби.
Гьаннала гIергъира гьарилла гIямрулизир ва бузерилизир сархибдешуни имцIадикIаб, чула дигутани разибирули хIербиэс кьадарбиаб! Чула дурхIнала ва илдачибад акIубтала челябкьла даршусили биаб!