Дуклуми агар адам
Арцес хIейрар сеналра,
Хьулани ва кьасани
Сар адамла дуклуми.
(Халкьла бурала)

МугIяллимтала, тухтуртала ва декIар-декIарти санигIятуни дузахъути адамти хIербируси, машгьурси Сергокъалала районнизирадси ГIялиева Загьидат БяхIяммадовначила саби иш дила белкI.
Загьидат акIубси сари гIядатла хъалибарглизир 1978 ибил дуслизир Сергокъалала шилизир. Сунес гIергъи акIубти кIелра рузичи хIеррикIули, Загьидатли хъулир дахъал хIянчи дири, сенахIенну Загьидатла бегIти бархIиахъайчи хIянчилабад чарбулхъути ахIенри. Илдала дудеш БяхIяммад (сунела бунагь-хатIа уркадуц) редакцияла хIянчизарли узули вири, неш ПатIимат биалли – совхозлизир рузули калун.
РиштIахIейчирад Загьидат ГIялие­вас му­гIяллимла санигIят дебали гIяхI­бил­зу­сири. Хъулибти биштIати рузбас дурсри дарахъес кумекбирули рири. Зумали, илдас мугIяллим ретаурли, хIязанира дурадуркIи.
УрчIемъибил класслизи араайчи Загьидат Сергокъалала цаибил школализи рашули калун, гIур кIиибил школализи ласрухъун. Цаибил школализиб бузути Разият ГIязизовнани (сунела бунагь-хатIа уркадуц), Рашидат МяхIяммадовнани, кIиибил школала мугIяллим Разият МяхIяммадовнани (сунела бунагь-хатIа уркадуц) Загьидатлис мурхьти багьудлуми дедлугнилизи халаси пай кабихьиб, илис гIямрула бягIуси гьуни гьаргбариб.
Загьидат ГIялиева школа таман­ба­рибхIели, Дагъиста пачалихъла университетла математикала факультетлизи карерхур. 2000-ибил дуслизиб гIяхIти кьиматуначил факультет хъараахъур. Направление хIясибли, ил ГIяялизимахьили рузахъес рурхьули сари. КIел дус хIянчи барибхIели, ил Мурегала школализи ласрухъунсири. БусягIятра Загьидат БяхIяммадовна илар математикала учительницали рузули сари.
«Багьуди — адамла хъарихъ» — биш­тIа­тази мурталра рикIули рирар Загьидат БяхIяммадовна. Ил багьандан мугIял­лимли мурталра белчIудиличи дурхI­нала пикри бяхIчииуси саби.
«Багьурси секIал мурталра пайдалабирес гIягIниси саби», — илгъуна жи саби илала дурхIнази. Илдас багьудила гьуни гьаргбирули, Загьидатла халаси къайгъи леб. Къиянни гIеббиути дурхIначил декIарли рузули, илди гьар секIайзиб гIеббаахъес бажардичерси Загьидат БяхIяммадовначи школала бучIантала бегIтира дебали разили бирар.
Загьидат ГIялиевани бучIахъути дурхI­нани олимпиадабачир жигарчерти бу­тIа­кьяндеш дирули, гьаларти мусни дурцули, имтихIянти-ОГЭ ва ЕГЭ гIяхIти кьиматуначил дедлугули дирар. Классла руководительница сарливан, Загьидатли чумал выпускной класс дураибти сари.
Загьидатлис ручIухIейчирад волейболла хIяз дигахъусири. ХалараибхIелира Загьи­датли районна учительти-ургар ду­ра­дуркIути абзаназир бутIакьяндеш диру­ли рирар. Гьалабванра Гъуниблизир де­тер­хурти абзаначиб илала командали кIиибил мер буцибсири. Районнизиб дураберкIибси «Самый классный — клас­сный» бикIуси конкурсличиб Загьидат Бя­­хIяммадовнани хIябъибил мер буциб. Сергокъалала кIиибил школализиб дура­бер­кIибси патриот темаличилси конкурслизирра З.ГIялиевани сунела коллективличил бутIакьяндеш дариб.
Гьаларван Загьидат БяхIям­ма­довна «Багьудила отличник» ибси уличи лайикьрикибси сари.
Мурегала школала директор Арслан­гIя­лиев ГъазимяхIяммад МяхIям­ма­до­вичли ва школала коллективли, школала бучIантачил илини бируси хIян­чилис ахъси кьимат кабалтули, баркалла бикIули бирар.
Ралгунси, гьалмагъдеш дузахъес балуси, дубурлан рурси Загьидатли, сари чинар рузули кали риалра, шанти-ургаб, сунени бучIахъути дурхIнала бегIти-ургаб халаси хIурмат сархес бажардирикиб. Мурталра разити дяхIличилси, марлис ва масхаралис гьалакси, малхIямти хIял-тIабигIятличилси Загьидат БяхIяммадовначи сари ралути лебтанилра пахрубирули саби.
Загьидатли сунела гIямрула юлдаш Булат ГIялиевличил хIябал урши абилкьули сари. КIелра халатигъунти урши, тухтурла санигIят чеббикIили, бузули саби, виштIасигъуна урши урчIемъибил класслизи вашули сай.
ХIурматла Загьидат БяхIяммадовна, хIед къаркъагъуна арадеш, багьудичебти духIни бахъбикIаб, сархибдешуни имцIадиахъаб!