МяхIяммадова Аминат ХIясбуллаевна акIубси сари 1952 ибил дуслизир МяхIячкъала шагьарлизир. БехIбихьудла классуназир МяхIячкъалализир ручIули калун, гIур биалли 9-11-ибти классуни Ахъушала урга даражала цаибил школализир тамандариб.
Школа таманбарили гIергъи Аминат МяхIям­мадовани хъали-цIа дуциб ва Урхьучимахьилизибси туке заведующаяли рузес рехIрихьиб. Сунела гIямрула вархкья МяхIяммадличил барх шел урши абилкьулри. Амма МяхIяммад МяхIяммадов жявли гIямрулизивад шалгIевухъун ва дурхIни Аминатличи хъарбикиб.
1985 ибил дуслизир Аминат МяхIяммадова Урхьучимахьилизибси урга даражала школализибси библиотекализир рузес рехIрихьиб. Библиотекализир рузес рехIрихьили гIергъи Буйнакъск шагьарлизибси педагогикала училищелизи ручIес карерхурсири. БусягIятла замана биб­лиотекарьлира, мугIяллимлира рузули сари.
ДурхIначи дигичерси Аминат ХIясбуллаевна библиотекализи дугьабизурти бучIантала ва мугIяллимтала къуллукъ бетерхахъес къайгъилизир рирар.
ДурхIнази багьуди касахъес, илдас гIяхIси бяркъ бедес чекаризурли рузули сунела бузерила гьуни даимбирули сари илини. Аминат МяхIяммадова сунени касибси санигIятличи ралрикибси, гIяхIти уркIи-хIялла, сабурла, яхIчерси, чинар рузули риалра коллективла ва шила шантала-ургаб хIурмат сархибси хьунул адам сари.
Аминат ХIясбуллаевнани жавабкардешличил рузули, сунела шелра урши абикьур. Халалгъуна ГIяли – 1991 ибил дуслизив ВатIайс къуллукъбарахъес арукибсири, гIур хъули чарухъун. 1995 ибил дуслизив кIиэсил урши — Камил Ва­тIайс къуллукъбарахъес арукиб, амма ит манзиллизир детурхути Чечентала мер-мусаличирти вайти анцIбукьуначи къар­ши­икиб. Къизларла районна Первомайское би­кIуси шилизиб Камил левси танк душмантани баргаибсири. ВатIан­ра, халкьла челябкьлара даршуси биахъес багьан­дан жагьил уршили сунела гIямру кьур­бан­да­риб­тири.
ГIямрулизивад арякьи гIергъи Камил пачалихъла шайзивад «Гъабзадешла» орденничил шабагъатлавариб. Аминатла хIябэсил урши ХIяжимурадра жявли гIямрулизивад арякьун, уркIила изайзивад.
Авэсил урши ХIясбуллагь МяхIяч­къалализив автобусла шоферли узули сай.
ВиштIасигъуна, шуэсил урши Шамил Ахъушав военкоматлизив узули калун. Амма Шамиллара гIямру къантIтили урдухъун, 33 дус виубхIели зягIипикили, гIямрулизивад арякьун. Чисалра кьадармабараб чула дурхIни хIярибихьес.
Аминат ХIясбуллаевнас суненицун абикьурли, гIяхIси бяркъра бедили, багьудира касахъили, хъайчикабатурли, бекIбарили, паргъатли кариэс гIямал биубли ахIен, хIябал жагьил урши гIямрулизибад арбякьи саби. Аллагьли Гьалжанала агьлула бараб саби!
ГIямрула вархкьялара, гIур хIябалра уршилара анцIкьи чедаили, хIериэс багьандан халаси сабурра, яхIра диэс гIягIнили сари. Аллагьли илдигъунти тяхIяр-кьяйда дедили сари малхIямси, гIяхIти уркIи-хIялла регI Аминат МяхIяммадовас.
Илини бурули сари, сунела дигутани, барх бузутани анцIкьи дяхIяахъес сецад ку­мек­бирулил. Халаси баркалла багьахъес дигули сари сунечил барх бузути, гIяхIти, су­не­ла децI иргъути, сабур­ба­рахъес ку­мекбикIути хьунул адамтас. Ил­ди саби Ма­сай МяхIяммадова, Залму ГIяб­дул­хIя­ли­мова, Аматуллагь ГIябдул­хIяли­мова, Мар­зият ГIябдулхIялимова.
Аминат МяхIяммадовала балгни иш­хIелла манзиллизир кадиркути анцI­букьу­начира къячдилкули сари. Цар­хIил­тасван, илисра дигули сари, Аллагьли жяв-жявли СВО-ра ахирличи бикахъили, нушала бургъантани чедибдешра сархили, нешанази анцIкьира, децIра чехIедаахъили, уршби ара-сагъли хъули бегIтачи, узи-рузичи, дурхIначи, хъалибаргуначи чарбухъахъес!
Амин, я Аллагь, викIес саби кавлуси!