МяхIячкъала шагьарла Редук­торный посё­лок­лизиб бухъяна жагаси уркь­лала гьуни леб. Ил гьу­ни ба­рибси саби Каспи урхьула рамчани шагьарлизи духI­на­хIедерхахъес багьандан тIаш­батурси бетонна гьалабизла чедиб. Бурасли, ил гьунчиб ита-иша башути адамти дугели ва хIерели камбирути ахIен.
Ил гьунчивад сайра ну хIянчила вашуси. Гьунила ца шайчир тIаш­да­турти бел­кIа­начилти уркьлала ургар лер адамтала суратуначилти кIел халати уркьулира. Ца уркьа чедиб леб «Дагъистанланти – Советский Союзла Игитуни» («Дагестанцы – Ге­рои Советского Союза») бикIуси белкI, цархIил уркьуйзи кадатурли сари СВО-лизиб Россияла Игитла у сархибти бургъантала суратунира. Илди бахъалгъунтала мякьлар Че­бяхI­си ВатIа дергълизиб бургъули ка­лунти хала дудешунала суратунира лер.
Гьар ил уркьа мякьла ваиб­­хIели, ну тIашилзули вирусра ва халаси пахруличил хIерикIусра нуни валуси Уркухъла шилизивадси ЧебяхIси ВатIа дергъла бутIакьянчи Жамав Ражабовла суратличи. Илала мякьлаб леб илала рурсила урши Россияла Игит Шамил МяхIяммадовла суратра.
Уркьуйзи имцIа­да­рили сари арбякьунси дуслизир СВО-лизир Россияла Игитла у сархибти гIяхIгъубзнала суратунира. Уркьа удибси балуй шайчибси къяйлизиб нушала районна Кьялкнила шилизивадси Россияла Игит СягIид Ибрагьимовла суратра леб. ЧебяхIси ВатIа дергъла бутIакьянчири илала хала дудеш Са­лихI Ибрагьимовра. ГIяхIси адам вири, сунела гIяпабаркь, кьялклан ЯнтIула СалихI. Илала ва чумал цархIилла суратуни кадатес уркьуйзиб мер баили ахIен. Баласра нуни: Украиналичилси дергъ таманбирар, илаб Россияла Игитла у сархибти лебилра нушала бургъантала суратуначилси цахIнабси уркьуйзи лебталалра хала дудешунала суратуни кадалта…
Суратуначилти уркьлала гIелаб саби нуни сунечила лукIуси Игитунала дякь (Аллея Героев). Илаб гьар Игитлис хасбарибси галгара леб. ДиштIати уркьлази декIарли делкIи Игитунала уми, илди галгубачи черяхIкахъили сари.
Игитунала дякь бехI­бирхьуси мерличиб адамти кабиръахъес барибси чятирра жагати духъяна утнира лер. Акьуси бархIилизир нуша ила учидиркули дирехIе, бамс­риахъес, гIямрулизир диубти анцI­букьуначила ихтилат­дикIес. Дебали бахъал адамти учибиркуси мер саби ил. Баркалла биаб илаб Игитунала дякь барес пикрибарибтас.