Хайдакьла районна Мажалисла шилизиб Батирайла уличилси кьакьа къирли бурцнила хIянчи ахирличи дикахъиб. «Дила Дагъистан – дила гьундури» бикIуси республикала проектла дазурбазир хIянчи детурхахъули, 545 метрла гIекъадличилси ва 4,5 метрла бягIудличилси гьуни илаб къирли буциб. Гьалаб ил кьакьакад вашес дебали къиянбулхъусири. Ил мерличиб хIер­бирути адамти, заб даралли, гьатIира ватихьес къиянни саби или бикIулри. СВО-ла 6 бутIакьянчила хъалибаргра ил кьакьа­лизиб хIербирули саби. ХутIла станцияличира ил гьуникад аркьуси сай. Социальный бяхIчибизлашалси объектличи аркьуси гьуни сагабарни лайикьли саби.
Адамтала дугьабизуни районна администрацияли хIердариб ва кьакьа къулайси агиличи бушиб.
«Заб даралли, иш гьунчивад вет-садухъес тяхIяр аги. ДуцIрумла замана мурталра хясала гулум сабри. Нушала тилади аргънилис ва ил масъала арзес кумекбарнилис халаси баркалла балахъулра республикала ва районна руководстволис», — бурули саби СВО-ла бутIакьянчибала хъалибаргунани.
Лерилра хIянчи хIябал бархIила духIнар тамандариб. Гьуни къирли буцес багьандан, хасти техникабира ила тIалабдариб. «Дила Дагъистан – дила гьундури» бикIуси республикала проектла дазурбазир Мажалисла шилизирти 4 кьакьа гьатIира сагадарес пикри саби.
Муниципалитетла бекI Запир ХIясановли республикала руководстволис баркалла багьахъур, районтазиб хIербирути адамтала гIямрула шуртIри къулайдарес имканбикIахъути проектуни алкIахънилис.
«Илдигъунти проектуни шимала мер-мусаличиб хIербирути адамтас мекелли мягIничертили детарули сари. Мерличибти адамтала сиптаби пикрилизи кайснилис ва гIямрула шуртIри къулайдирнилис республикала руководстволис баркалла балахъулра», —викIи З.ХIясанов