Калаби хIулкIули, рузи дила Таибат!
ДуцIрумлизиб цIуэри
МалхIямли хIербилзуси,
Дубурла чехьертани
Бургар ил гьигьбируси.
Кьисматла кьячIикIуначиб адамлис сегъунти-дигара анцIбукьуни къаршидиркули сари, чумра журала адамтачил гьунивиэс кьадарбирули саби. ГIергъиси замана тIягIямагарти анцIбукьуначи имцIали вяхIигухIели, гIяхIти адамтачилра тяниширес имканти алкIухIели, уркIи хIулбуркIули бирар. Илкьяйдали дила уркIи тамай гIяшикьбарибси адамличила саби иш белкIра.
Хабарагарти анцIбукьунала дазурбазир МикIхIила шилизир акIубси ва Избербаш шагьарлизир хIеррируси Таибат ХIяпизовачил къарширикира. Иличил ихтилатлизи ахъибси ну пикрумала варачайзи гIеларикилри: «Чинар чераира вара иш пергерси адам? Ишала малхIямси тIама, исбагьити куц-кабиз, гьинталаван кункти шикьатIала дахъ тяништиван дилзулигу…». Илдигъунти адамти бегIлара черикIла адамтала хасиятуни цаладяхъили акIахъубси сипатли детарниличила кIинайс аргъира. ХIебиалли ил нуни гьачамалра чераили ахIенра, амма адамлизир диэс дирути гIяхIтигъунти баркь-бацра, пикрумира сунезир лерхIели чеббикIибти адамтачила гьанбиркахъули сари илини. Илдигъунти пикрумази рархибси дила гьалабси халаси кьумур илала рурси Эльмирани жура-журала берклумани бицIахъиб.
Илкьяйдали пергерти гIяхIялдеш дарили гIергъи, Таибатра нура бамсриахъес алавдакIира. Устадешчебти ва къайгъичебти адамтани лергIер жагали далкьаахъурти юрт-мусализир уркIи-рухIра тамай ряхIяткадирулри. Шагьарла дайлаб биалра, Таибат хIеррируси мерличир я машинабала, я цархIилти адам паргъатагарвирахъути тIама-гьама аги ва тIягIямла паргъатдешлизир чархла биркIанти цIедешла анхълизирван ряхIяткадирулри. Белики, столличирти гьар журала цIедешла бизиси тIемли бурги илгъуна баракат хъа бухIнаб тIинтIбиахъубси. Дубурла урунжлагъуна малхIямли зайбикIуси дила гIяхIялла тIамали ну Гьалжанала анхълизир ахIенрара или гьанбиркахъулри. Ил сунела гIямруличила, гIяхIцад дусмазиб сунени бучIахъули калунти дурхIначила, дигути микIхIентачила, сунела къугъаси хъалибаргличила лебгIеб жагаси ихтилатлизи ахъилри. Илала дурутазибадли нуни аргъира ил дахъал дусмазир сари акIубси шилизир мугIяллимли рузули калниличила, пергерти уршби-рурсби абикьурли, илди чула гIямрула гьунчиб къугъали хIербиахъести имканти акIахъниличила…
— Гьари, дила рузи, раши хIези нуни дила музей чебиахъисну, — рикIар ил, — кIиэсил дерхIличиб мерлабарибси саби ил нуни.
Илала музей чебаибхIели ну гьатIира цIакьли тамашариубра. Илар нушала бегIтала ва хала бегIтала гIямрулизир пайдаладирули калунти гIягIниахълуми лер. Чидилти дусмазиб, сегъунти палтарличил микIхIентицунра ахIи, даргала миллатла вакилтира бегIбирулрил баянбирулри илини ва дахъал журала палтар чедиахъулри. Хъали-цIализир ва авлахъла хIянчилизир пайдаладирути гIяхIцад дусмала тарихли детаурти ваяхIра дахъалри илала музейлизир. ЧеалкIуси наслула вакилтас хIябилра пайдаласи сабригу ил.
ГIебшнила давлачебси манзиллизир акIубси Таибат цархIилгъуна риэсра хIерири. Илала гIямрула пергерси гьунчила ва илини ахъси даражаличиб мугIяллимла санигIят бузахъули калниличила кIинайс газета бучIантас белкI гьалабихьес пикрибарилра, иш гьакIлис биалли ил акIубси ноябрьла бехIбихьудличир илис назмула чумал тугъ пешкешдирулра:
Дагъиста дубуртачир
Шурми дирар чIумати,
ХIугъунти нешанани
РуркъухIи багьадурти.
Зак бицIибти зубарти
Сари нурли улкути,
ХIушагъунти хIялалти
АлкIухIи мугIяллимти.
Рурсбази минадарри
Мардешла къиликъуни,
ХIербиахъес хIулкIули
ДуртIули гIяхIдешуни.
ХIугъунти адабчебти
Нешаначи саб тIашси,
Абзурли иш дунъяра
БекIла чедибси закра.
ЧевяхIсини юрт хIела
БицIахъаб гIяхIдешуна,
ХIела уршби-рурсбала
ЦIакьбирули уржибдеш.
Аллагьли кьадардараб
Дусми гибтицад гIурра,
Баракат имцIабиаб
ДурхIни талихIли баргаб.
Калаби хIурмат ахъли
Тилбайла дубураван,
ХIулруркIули дурхIначи,
Рузи дила Таибат.