Илди агарли хIериэс вирару?
Иш белкIлизиб наб ца суал ахъбуцес дигулра. Сегъуна или хьарбиадалли, «Технологияби агарли адам хIериэс вирару яра хIейрару?» ибси.
Се сари технологияби, селис гIягIнити илди яра бекIлил хIяжаттив, ахIену? Технологияби сари, нушани хутIличил дузахъути лерилра секIал. Масала, телевизорти, телефонти, компьютерти, палтар, кьям-кIуцIул ицути машинаби ва гIурра дахъал бекIахъудилизир пайдаладирути гIягIниахълуми. Илди гIягIнити сари адамла мерличир, илала илцад-декIар цIакьани харжхIедиахъубли, сегъунти-биалра баркьудлуми дурадуркIес. ВегI ца секIайзи вархили, илдази цархIил секIал барахъес вирули сай. Илкьяйдали ца бархIила духIнар дахъал секIал дарес бажардивиркули сай. КъантIли буралли, илдани адамла гIямру гьамаддирахъули сари.
Нуша бирсикадиубхIели илди гьар бархIи дузахъес гIяхIбилзули саби, амма гьарли-марси тIабигIят касалли, илдани вай саби бируси. Мисаллис, беркала бируси гIягIниахъалализи (мультиварка, аэрогриль) нушани, хIядурдарили, лерилра секIал кадирхьулра, сунени биалли, балкьаахъурли хурег гьалабирхьули саби. ГIе, гьамаддеш саби. Амма илдигъунти хурегуни арадешлис гIяхIти сари дикIулрав? Юх, селра агара. Иличи че, технологиябани адам азгъинвирахъули, камли вяшикIахъули сай. Илдигъунти аги-кьяйдали биалли, жура-журала излумани чарх бирцIахъу.
Сен гьалабла замана цалра технология агарли лерилра хIянчи дарес бажардибирутири? Хъулирти хIянчи дурарад хъумира бекIкадарили, вецIалцад дурхIялис бяркъ бедесра бажардибиркутиригу хьунул адамти. СенахIенну азгъиндеш хIедалули вяшбикIухIели, савли-жявли абизурли, лерилра секIал дирухIели. Ну технологиябачи къаршили ахIенра, амма илдазирад цацадехIти бекIлил дураэсра гIягIнити ахIенри. ТIалхIяна дирцес, беркала барес гьанна хIебирулив адамтани?
Гьаннала замана технологияби агарли хIерирусира агара, хIериэс дигусира агара. Сегъуна машина дураили биалра, гьарилла юртлизиб ил биахъес къайгъилизиб саби.
Анжела Мутазова