ВецIал дус гьалаб гьаннаван телефонтачи халаси хIяжатдеш лебси ахIенри. Мобильный телефонтала мерличир адамтани бархбасуни кадизахъес багьандан цаличи ца кагъурти лукIули, дурхьули бири. Илкьяйдара гIямал бетарулри.
Гьанна биалли, мобильный телефон хъулиб уббатурли, чина-биалра дураухъесалра вирули ахIен. СенахIенну гIямрула дахъалгъунти масъулти ва хIянчи илизир бекIдирули сари. Илдигъунти кадизурти аги-кьяйдализиб, гьайгьайрагу, мягIничебси саби бархбас (связь) къяббердни агарли бурцни. Илала аги вайтIа биалли, сецад телефоннизивад гъайикIули хьалли, цалра гъай аргъес имканхIебикIур. Ил багьандан бархбасла даража ахъсили биахъни дебали мягIничебси масъала саби.
Дигеси саби бусягIятла замана ил шайчир дарсдешунира кадиркни. Дубурла гьарахъти шимазирра мобильный телефонтала бархбасуни къяббердни агарли дузахъес имканбикIахъути антеннаби кадилзахъули сари, илхIелира декIар-декIарти оператортала. Иличибли цацадехIти учреждениебазиб Интернет ахъси даражаличиб бузахъесра вирар. Бузерила хьулчилибиубси ва бекIлибиубси бутIара гьанна Интернетличил бархбаси саби. Ил агара биалли, черкад дашахъути дахъалгъунти тIалабуни хIянчилизир детерхахъес имканхIебикIусили уббулхъули саби. Ил багьандан телефонтала ва Интернетла бархбасуни гьаладяхI дашахънилизи кацIибси ганзли ил шайчир гьамаддешуни алкIахъули сари.
Гьарахъти шимазиб хIербирути адамтани илди бархбасунала кумекличил районнизир ва республикализир бекIдарес вирути, бикIуливан, хъулибад дурахIебухъи, масъултира камси заманала духIнар гьунчидикахъес бирар. Гьайгьайрагу, ил нушала гIямру бархIиличи-бархIи гьаладяхI дашнила лишанра саби.   

Салимат ГIялиева