Гьанбиркур наб 2016 ибил дусла августличиб нушала газета 95 дус биънила хIурматлис редакциялизи бахъал адамти учибикили. ИтхIели ну кIиэсил дус «Замана» газетализив корреспондентли узулри.
Илав сайри ну Дагъиста халкьла поэт Мя­хIяммад ХIямидовличил тянишиубсира. КIи­найс нуни ил пергер адамлис ва пагьмучевси поэтлис ца макьалара балли багъишлабарибсири.
Газетала хIянчизар МяхIяммад Ра­бадановла гъамси юлдаш ва дила ту­хум бускран Хасбулат Хасбулатовра нушала газетала юбилейличи ва­кIиб­сири. Гьар дус Хасбулатли сунела шантас 50-цад «Замана» газета къул­басдирутири. Ит бархIи биалли, Хас­булатли МяхIяммадлисра набра ва ца-чумал нушала юлдашлисра Редук­тор­ный посёлоклизибси ца рестораннизиб берк-бержличилси шадлихъ ду­ра­­беркIибсири. Баркалла биабну сунес.
ИтхIели нушачи гIяхIладли бакIили лебтири жамигIятла хIяракатчиби Перзият БяхIяндова ва ГIяйшат Бибалаева. Илданира нушала газеталис халаси кумек бирусири…
«Замана» газеталичилси дила тянишдеш, илис «Колхозла байрахъ» бикIухIели, ну Сергокъалала педучилищелизив учIули левалли биубси саби. 13-15 дус виубси нуни ила дила цаибти, газетала хIянчизарти бикIуливан, «хIедикьурти» назмурти дурхьули вираси. Газеталара дилара юлдашдеш ну мугIяллимли узухIели даимдиубтири. «Ленинна байрахъ» газетала бекI редактор ГъазимяхIяммад ЖабрагIилович Юсуповли Дибгашила школала урус мезла учительли узуси набчи газета учительтази кайсахъес къайгъибарахъес тиладиличил гьар дус кIина сунела шайзирад кагъурти дурхьутири. Ну школала директорли узухIели, бурес вирус нуни, Дибгашила урга даражала школала лебилрара-сера учительтани «Замана» газета кайсусири или (илхIелира илала бекI редактор ГъазимяхIяммад Юсупов вирусири).
Гьанна вецIну цара ибил дус ну газетализив корреспондентли узулра. Газеталичила ва илала агьлуличила гъайикIасли, чIянкIли гIяхIсицун ахIи нуни бурес хIейрус.
ЦархIил се хIебиэса, газетализи вакIибхIели, дила у бархли барсбиуб. 66 дус виайчи дила у Мурад бирусири. Гьарли-марли, гIярбукIан Мурад Къянаевла у саби наб бегIтани бихьибси. Сунела хIянчиличи чедихIяртли хIерикIуси шила советла секретарьли акIнила хIекьлизибси свидетельстволизи у балкIли белкIниличибли, ну Ражабов Мурад ГIяммаевич Ражабов ХIя­жи­мурад ГIяммаевич ветаурсира. Тяп илгъуна хатIаличибли нуша цабехI неш-дудешла дулекI­ла хIябал урши узбилира детхIерулра. Ца узи мет­рика хIясибли Ражабов МяхIяммад Ражабович сай, итил — ГIяммаев СягIид Ражабович.
Ну, ХIяжимурад ГIяммаевич Ражабов, гьаб-гIергъили вецIну цара ибил дус «Замана» газетала редакциялизив узулра. ХIябал дус гьалав шила школала мугIяллимтала кьукьялизивад декIарикибси ну сагати барх бузутала кьукьялизи къаршиикира. Камси замана набчил барх бузули калун Запир Харбилов ва ГIябдулкьагьир МяхIяев. ИтхIели набчил барх бузули бири мулебкIан МяхIяммадмухтар Мур­тузагIялиев ва дибгашан Мя­хIям­­мад Рабаданов. Дебали дигахъаси наб илдачил лякьирикIес. Мя­­хIям­мад­­мухтар, нуван, урус мез­лира лу­кIусири. МяхIяммадла цар­хIил­ти газетабала редакция­базибра балути бири. Сунелайчир дудешла узи Сулайбан Рабадановла назмуртала жузи дураэс къайгъи имцIали бири илала. Илини сунела арцлис, лерилра урус мезли дурадухъунти Сулайба назмурти учидяхъили, «Колыбель» («Сири»)би­кIуси назмуртала жуз ду­раиб­сири. Бурасли, деба­ли гIяхIси жуз бетаур ил. Жузлизи кадерхахъурти им­цIатигъунти назмурти, Су­лайбан Литературный инс­титутлизив учIухIели, иличил барх бучIути урусла поэтунани дарган мезличирад урус мезличи шурдатурти назмуртири. Чараагарли дураэс гIягI­ни­сири поэтла илгъуна жуз. Мя­хIям­мад­ли ил хIянчира чебета­ахъи­ли бариб.
Мурталра хьуликIусири МяхIяммад гIурра Сулайба назмуртала жузи дураэс. Гьачам нуни илизи хьарбаибсири: «Ягъари, МяхIяммад, хIуни хIела арцлис Сулайба жузи дурайулри. Чилилра делчIесара илди? Лебалара нушачиб назмурти ду­чIути?». «Нуни ил ­суайс хIед жаваб гес хIей­рус, Мурад ГIяммаевич, — викIар ил. – ВебкIес гьалав адавзини сунела назмурти дугIли кахIелахъес набзи тиладибарибсири. Ну илис къянавиэсра хIейрус. Дахъал лералти сари Сулайба бекIлил печатьлизир дурахIедухъунти назмурти. Нуни вирусигъуна къайгъибирисра илди дураэс». ХIера, илгъуна адам вирусири журналист ва тилмаж, поэт ва писатель, дила шан ва унра ТагIе МяхIяммад.
Дебали гьанриркур наб рахъхIи нушала газетала редакциялизир машинисткали рузуси ванашикан, пергер хьунул адам Раисат Гереева. Илиниван нушала газетала агьлу балуси цархIил адам хIейри. Наб гIягIнибикибхIели, нуни илизи илдачила баянти хьардиули вираси. Раисатли дила гьарил суайс жаваб луги. Чуйнара гьанушиб илини дила бегIлара виштIаси узи СягIид. Илини бурни хIясибли, ил нушала газетала сахаватси юлдаш уилри.
Раисатличил рарх машинисткали рузули рири цагьатIи пергер хьунул адам — хIямшиман Калимат ГIяб­дул­лаева. Тамашала журали бизити шайтIа кьапIнала нергъ дирутири илини (итхIели нушала столовая бирусири). Наб илди нергъ цацахIели гьаннара гьандиркур.
КIелра чедиб гьанбушибтачил рарх машинисткали рузули рири ЦIу­да­хъарла шилизирадси хьунул адам Зугьра Рабазанова. Илини «компьютертала гъай» дебали ункъли дали. Рахли дила компьютерлизиб се-биалра нуни балаэс хIей­руси хIянчи дакIубухъалри, ну тиладиличил Зугьрачи дугьавилзусири.
Газетала агьлула лебилра цархIил­ти хIян­чи­зарти жагьил хьунул адамти­ри. ГIяхIцадхIи калунра ца нуцун му­­рул адам илдачил варх печатьла Юртла гехIъибил дерхIличив. Гьар бар­хIи савли хIян­чила лябкьути илдани, дила кабинетлизи гьаб­бакIили, «Вел­­хIунрив, ХIяжимурад» бикIули, наб салам лугусири. ИлхIели газетала бекI редакторли Салимат ГIялиева ру­зу­сири.
АнцIбулкьули бииши наб илаб цацахIели, ва нуни кьасбарибсири дила кабинетлизи мез далуси попугай кабатес (нуни дила пикриличила газетализи хабурти дархли делкIунра).
Камси заманали нушала редакциялизиб дакIубухъун жагьти мурул адамти ва студентуни. БусягIятла замана нушала газетала бекI редакторла хIянчи заманалис дузахъуси жагьил адамра илдазивадси ца сай. Ну илини сунела хIянчи цархIилтаничиб ункъли бирниличи вирхулра.
Дила халаси кабинетлизи цархIилти 2-3 хIянчизарра кабатур. Нушачил ца дерхIличи мерлабариб къумукъунала редакцияра. Сагадан мицIирсабиуб нушала жаняхIра.
Иш халаси ахIенси газетала макьа­лализир набчи хасси дукелцIи­духъесли секIал сипатбирниличил нуни нушала газетала редакцияла агьлула вецIал дусла духIнарти гIямру чедаахъес пикрибарибсири. Дила пикрили, нуни ил хIянчи барес виубра. ИшбархIи 105 дус бируси газетала гIурра 95 дусла гIямру гьанхIедушили лерал. Наб дигахъаси илди гIямрура чили-биалра сипатдарили.