Газетали­зир ну рузес рехI­ри­хьиб­хIей­чи­рад гехIел дус дикили сари. ХIурхъанти би­­кIуливан, наб ца бархIи абхьибти ре­дак­цияла унзали миллатла газетаби-журналтала дунъя гьаргбариб. Наб мурталра нешла мез дигахъутири, мезла цIакьли дунъя жагабарес, адамти цалабяхъес ва рухIла давла мяхIкамбарес бирнили дила уркIиличи халаси асар бариб. Амма, нешла мезличил дурабулхъуси республикала кьадрила газетализир рузус или наб гьанра биркуси ахIенри.
Бузерила цаибти бурхIни бажардириишара хIе­риишара ибти пикрумани ди­цIилри, биалра гъира-иштяхIличил рузес рехIрихьира. Редакцияла гьарил хIянчизар газетала гьалмагъуначи дархьти баянти даахъес, даргантани диахъубти сархибдешуначила багьахъес чекабизурдешличил бузулри. Варъа бучес сакIубли дузути мирхъиван бузулри газетала коллективра, гьар дурайуси номерлизи чула уркIила ванадеш кабирхьули. Наб журналистла хIянчила дигIяндешуни дяркъес, лукIесцунра ахIи, кадиркути анцIбукьуначила балес, цацабехIтани пикри бяхIчихIейути нешла мезличила дибгIян-хъяшти баянти гьаргдирес хIяжатлири.
Арсен ГъазимяхIям­ма­до­вичла бекI­деш­лиубси газетала хIян­чизар­тани ну чула кол­лективлизи разили кьабул­ра­риб­сири. Гъайла къантIа, чула санигIят ункъли бяркъурти, мурхьти багьудлумачилти адамтани алавруцира. Ит­хIели Салимат ГIялиевани газетала бекI редакторла заместительла къуллукъуни дузахъулри.
Илини гьар се-секIал гIердурули, рузахъес бурсирарира. Буралли, илини сарри ну редакциялизир рузахъес жирарибсира. Гьар бархIи дила гьалар сагати масъулти тIашдалтулри, багьла-багьлали суратуни кайсутала, хатIаби гьаргдирутала хIулбани дунъяличи хIеррикIес бурсириуб­ра.
Корреспондентла хIян­чи хъарбаркь таман­барахъес чина-биалра урхьниличил бархбасунси саби. МяхIячкъалализир дурадур­кIу­тачирцунра ахIи, республикала районтазир, шими-шагьуртазир дурадуркIути дал­дуцуначирра бутIакьяндеш дирес ва илдачила макьалаби лукIес рехIрихьира.
«Замана»-лизир рузули дила миллатличил, илала тарихличил ва культураличил мурхьси бархбас лебниличила аргъира. Нешла мез мяхIкамдирнилизи, илди гьаладяхI дашахънилизи белгиси пай кабихьес имканбакIни дила игъбарлизи халбирулра. Нушала газетализиб машгьурти дарганти бузули калунти саби, сепайда, наб илдачил рарх рузес кьадархIебиуб. Мурхьти багьудлумачилти даргантазивад цали сайси ГъазимяхIяммад Жаб­ра­гIилович Юсуповла урши Арсен Гъа­зимяхIяммадович Юсуповли сарри ну хIянчиличи руцибси. Газета гьаркья­тала къяйлизи дурабухъахъес, коллектив гIеббуцес гIяхIцад къайгъни дакIудариб илини. Гьанна А.Юсуповли цархIилти къуллукъуни дузахъули сай. Ну рузухIейчирад редакциялизиб кIел-хIябал бекI редактор барсбиуб.
Гьарилла хъули дурхъаси гIяхIял­ван абицIуси «Замана» га­зе­­тали 105 дусла гьуни ахъили са­би. Ил гьунчир сегъунти-дигара анцI­бу­кьу­нира кадикиб. Ну рузути дусмазир детауртачила бурасли, бегIлара цаибси — коронавирусла чейхъуси изала Covid 19. Агь, ит замана нушаб севан къияннирил… Къияндеш бахъхIи бууси ахIен бикIули бирар, черардякьун итди бурхIни, амма чедакIиб гьатIира декIти, уркIби хIекьли кьакьадикIахъути бурхIни — дявила хасси балбуц бехIбихьибти. Ил балбуцли нушала уркIби ишбархIира датдулхъахъули ахIен, дузесра гьамадли ахIен. Сен-биалра хIянчи даим­бирулра. Нушани бургъантачил ва илдала гъамтачил бархбасуни кадилзахъулра, дубурлантала игитлати гьунартачила макьалаби лукIулра, илдачил пашмандешра разидешра дуртIулра. Лебталалра ца мурад саби – дявила хасси балбуц жяв-жявли таманбиъни ва нушала бургъанти чула хъалибаргуначи чарбухъни.
Юбилейличил бархбасахъи, ди­ла бархкьябас чIумаси арадешра, хIян­чи­лизир сархибдешунира дулгулра, газета хIурмат-хатирличил гьала­бяхI башули дигулра.