Ну «Замана» газатализир дус гьалар сарра рузес рехIрихьибси. Газеталичила биалли, нуни бегI гьалаб багьурсири верхIъибил класслизиб. Ит замана нушази дарган мезла мугIяллим Зухра БяхIяммадовнани школаличила сочинениеби делкIахъун. Дила белкI нуни «Замана» газетализи кабяхъяхъес бархьибсири. ИтхIели бехIбихьибсири дила «Замана» газеталичилси бархбас.
11 класс таманаибхIели нуни дила гIямру нешла мез руркъниличил, гьаладяхI дашахъниличил дархдасахъес пикрибарира. ИмтихIянти дедили, ну Дагъиста пачалихъла университетла филологический факультетлизибси урусла-Дагъиста мезанала отделениелизи карерхурсири. Ил университетлизибти дарган мезла мугIяллимти Муса Расуловичли, Эмминаханум МяхIяммадсягIидовнани ва Узлипат ГIусмановнани дила нешла мезличи диги гьатIира имцIадиахъуб. Цаибил курс таманаили гIергъи, наб «Замана» газетализир рузес кьадарбиуб. Дурсрачира рашули, цазаманализир хIянчилар рузесра рехIрихьира. ИтхIели газетала бекI редактор сайси ГIябдуряхIман ИсмягIиловли руцибсира ну корреспондентла къуллукъличи.
Газетализир ну 2025 ибил дусла сентябрьличирад рузулра. АрагIебли дусалра хIянчи хIебарили риаслира, наб итмаданал ишабти хIянчизарти гIяхIбизур, илдани ну гьарил секIайзир гIерруцира, бузерилизир багаладиэсти насихIятуни дуриб. Наб редакциялизир рузес дебали гIяхIбилзули саби.
Редакциялизи ракIес гьалаб ну литературный мезли илцад-декIар жагали гъайрикIес ва лукIес балуси ахIенри (лугъатла мез далули хьалли), амма ишар ну багьла-багьлали бурсириубра макьалаби ва журналистла колонкаби лукIес.
ГIуррара наб бурес дигахъира нушала газета гIергъити дусмазиб гьалабяхI башниличилара. Дахъал сагадешуни дагьардиуб, чулира газета ишхIелла тIалабуначи балбикибсили бетарахъути. Илди-ургаб бегI гьалаб гьанбушес рирус нушала газетализир дурадулхъути цацадехIти макьалабачи (журналистла колонкабачи) делчIесцун ахIенну, лехIирхъесра вирни. Хасси куар-кодличи телефон бяхIчиаалли, вегIлис дигуси авторла тIамаличи лехIирхъес имканбикIур.
Нуни «Замана» газетара дила бархкьябира мягIничебси анцIбукьличил - юбилейличил мубаракбирулра ва дусличи-дус гьалабяхI башули дигулра.