Адамла гIямрулизиб халаси мер бурцули саби газетали. Телевизор, радио гьарилла хъулир хIедирухIели, лерилрара-сера багьахъниби газетализирад далутири.
Ну виштIали левай гьан­бир­кур нешли дарган мезли ду­радулхъути газетаби ва жур­налти къулбасдирули рири, ит­хIейчирад акIубти сари ди­ла «Замана» газеталичи ди­ги. Итала гIергъи нуни газе­та­личилси бархбасра къяб­хIебердахъира, сту­дентли вирухIели, гIур школализив узу­­хIели, мурталра г­а­зетаби-жур­налти къул­бас­дираси ва ду­чIаси. ЖумягI бар­хIи сабаайчи хIер­ли вираси.
Илди дигила асарлиув нура газетализи лукIес вехIихьира. Дила цаибти, илцад-декIар хIедикьурти макьалаби ва назмурти газетала хIянчизартани жагали лугIяндарили дурайутири. Дила разидешла ахир хIебири итхIели. Газетала хIянчизартани ну мурталра гьарил баркьудилизив гIевурцаси. Илдани дурути гъайли дила нешла мезличи гьатIиралра диги имцIадиахъуб: ну декIар-декIарти масъулти ахъ­дурцули, гьатIиралра жигарчевли лукIес вехIи­хьира.
Гьаннала къиянси заманара, чеалкIуси наслу нешла мезли гъайхIебикIухIели, газетали халаси къайгъи бирули саби мез дерцахъес, мяхIкамли калахъес ва гьаладяхI ардукес. Ил масъала черкад чумра «журуга стол» дурадеркIиб редакциялизир. Иличи че, дарган мез дяркъес дигутас матъал дурсри кадирхьули калун газетала хIянчизартани. ИшхIелла тIалабуначи далдикахъили, редакцияли гьаман декIар-декIарти конкурсуни ва викторинаби дурадуркIули дирар. Илди лерилра далдуцуни газетала хIянчизартани чула икьайчил ва харжаначил детурхахъути сари. СенахIенну илдала нешла мезличи уркIи изухIели.
Амма ишбархIила замана газета барес ва дурайэс гьамадли ахIен. Камли саби лукIути ва бучIути, ил багьандан подпискала шайчибси агира къиянсили уббулхъули саби. Илдигъунти аги-кьяйда сари газеталацун ахIенну, дарган мезли дурадулхъути лерилрара-сера журналталара. Сен-биалра даргантани газета гIеббурцниличи дирхехIе.
Ишдус ахIерси газетала юбилей сабливан, ре­дакциялизиб бузути лебтасалра арати гIямру ва чули чеббикIибси санигIятлис мардеш дулгулра. ГIурра гьалабяхI башаб хIушала пагьму, бугабикIаб кьалам!