Гьанна авал дус пик­ру­­мачил, баркьу­ди­ли­чил гIямрула гьа­рил бархIиличил ну «Замана» га­зе­­таличил цIацIали рархрасира. Гьа­­рахъси биалра, газеталичилси бархбас мурталра лебсири, риш­тIа­­хIели почтальонни нушала хъу­ли бихуси «Ленинна байрахъ»-ли­чи­бад бехIбихьили. Дила бегI гьа­ларти назмуртира халаси уре­хи-урезиличил «Замана»-лизи хиб­тири кадяхъяхъес. Илди ка­дя­хъиб нуни дархьибтиван, ца де­вал­ра барс­хIебарили. Газетала бяхI бу­цибти назмуртачибад бехI­би­хьи­ли, дила халали ахIенси пагьму даргала бучIантачи баиб. Гьанна нуни балулра, газетализи ракIни, ишар рузни гьаланачи бел­кIунси дила кьисмат биъни.
Даргала миллатличи наб дигуси тяхIярли дугьарилзес, илдачил ихтилатрикIес, дила гIяхIти пикруми илдачил дуртIес кьисматли наб имкан гили саби.
Авал дусла духIнар нуни гIяхI­цад макьалаби делкIунра, даргала ва Дагъиста тарихличила, ну­шала гIялимтачила, даргала писа­тельтала белкIанас кьимат кабалтути, даргала халкьла гIядатуначила бу­рути, нушачил гьанна барх агарти пагьмучебти поэтуни, писательти хъумхIертахъес жидикIути, гIяхIцад назмурти, дурхIнас хасдарибти дунъяла классикала произведенияби, даргала театрли кадихьибти кIел пьеса дарган мезличи шурдатурра.
Иша рузес ракIес гьаларра нуни гIяхIцад жузи делчIунтири, урга даражала санигIятла ва чебяхIси даражала багьуди касибсири, «Сакинат» бикIуси жуз дарган ва урус мезли, «ГьанкI агарти дугурби» бикIуси жуз дарган мезли дуракаибтири. Ишар рузухIелира «ГIямру даимдирар» бикIуси жуз дуракаира. Даргала динна гIялимтала тулкнала жуз литературала мезличи шурбатурра ва дуракаэс хIя­дур­ба­рилра.
Гьаннала гIергъира наб дарес дигути гIурра дахъал лерал, гьар бархIи сага-сагали ручIес ва лукIес дигахъулра.
Бурес дигулра, наб дила хIянчи дебали гIяхIбилзули саби. Ишар ну гьатIира багьудичерси, дахъал секIал дагьес дигуси ретарулра. Дила багьудлуми даргантачил дутIес бетарниличи дебали разилира. Илкьяйдали, даргала бучIантала гьалабси дила жавабкардешли­чилара хъумуртули ахIенра. Ди­ла ур­кIили бархьси саби или кьа­бул­хIе­барибси секIал, хIушачи хIе­баахъес къайгъибирулра.
Дила дугьбани, хIулбала хIерли, уркIила пикрили чилалра уркIи хумарбарес хIейгахъира.
«Замана» газета биалли даргала миллатла адабла ва культурала дурхъадеш саби. Илизирти белкIани даргантачила дарган мезли гъайдикIули сари. Мез биалли нушаб нешла ниъличил дарх кьисматли гибти сари. Нешла мезра гьарил адамлис цадехI сари лугути. Илди мезличил сай адам дунъя иргъес бурсиируси.
105 дусла духIнар газетализи кадяхъибтазиб даргала халкьла рухIла давла баргес вирар, хIеделкIи, кахIедяхъили калунти, нушачирад ардякьунти наслубани чучил дарх итил дунъяличи ардухиб.
Гьанна хIербирули лебти даргантани газета кайсули, бучIули, илизиб вайси чебаибсиличила га­зетала редакциялизи бурули, гIяхI­­сигъуна касили, халкьла урга тIинтI­бирули дигахъира. Дигахъира ба­гьудичебти, гIякьлучебти дар­­гантани газеталичил бархбас бу­захъули, чула гIяхIти пикруми ну­шачил дуртIули. Газетали биалли ил­ди гьамадли бахъал бучIантачи ди­ахъу. ХIукуматли нешла мезли гъайбикIуси газета дуракайъни бурес хIейэсли халаси давла саби. Ил давлаличил пайдаладикIеная, хIурматла ва ахIерти дарганти.