ГIяммузгай гIевдухьлизиб шан­дан цIала кумекличил дебш­лабирули бирар. Дебшла даражара устала дагьрилизирадли ва устадешлизирадли дигахъути сари. Нуни школара илгъуна гIевдухьличил цугбурцули рирус, сенахIенну дурхIнани багьудлумала ва бяркъла шайчирти дебш илар сари кайсути. Дигеси саби илгъуна гIевдухьлизир вегIла нешла мезлисра дебш лугни. ГIергъиси замана дебш дедес ахIенну, мез детихънила даражаличи диркнили бахъал гIялимти, мугIяллимти паргъатагарбирахъули саби, ва декIар-декIарти далдуцуни дура­дуркIули сари.

ХIера, мартла бехIбихьудличибра «Дагъистанна пачалихъла университет» ФГБОУ-ла ВО-ла Дагъистанна мезанала кафедрали ва Къаякентла районна «Сагаси Вихъри» бикIуси МБОУ-ли дураберкIиб «ДР-ла багьудила учреждениебазир нешла мез ва литература руркънила масъулти» ибси регионна гIилмула-практикала конференция. Ила жидарили, МяхIячкъалализирадли нура, ДГУ-ла профессор Муса Расуловичра, писатель Хизри Юсуповра Вихърила шилизи даилри ва школализи дукьес или гьайдиублира. Нушаб гьуниваибси ил школала мугIяллим ХIясайни ГIяппаевли гIяхIли цархIил шайчи жибирулри. ХIердикIулрагу, школала гьалабла буркьа юртла мякьлаб авдерхIла жагаси юрт тIашли. Илцадра жагали балкьаахъурси сагаси школала юртличи хIерикIес бархли иштяхIдухъеслири.
Школала духIна адацIибхIелира нуша дебали разидиубра. Илар иш­хIел­ла манзилличи далдикахъили, гьарил секIал далкьаахъурлири.
Вихъранти гIяхIялдешлис бурибти биъни дагъистанлантас жявлил ашкарси саби. Илдани нуша ва республикала шагьуртазибадли ва даргала районтазибадли цалабикибти гIяхIли уркIила ванати дигиличи кьабулдарира.
БегI гьалар нуша Зугьра Кьурбано­ва­ла шуибил класслизибси дарган мезла дарсличи жидарира. Чебаэсли­ри дарс­личи мугIяллим ва дурхIни ункъли хIя­дурбиъни. БегIлара дигесири бу­чIан­тани чедетаахъили литературала мез дяркъни ва ункъли гъайбикIни. Илдани се­гъуна-дигара суайс чедетаахъили жавабти чардалтулри ва нешла мезличи чула диги лерни аргъахъес къайгъилизибри.
Балбуц бехIбихьиб Къаякентла районна администрацияла бекIла заместитель Ольга Кьурбановнани.
— ХIурматла вихъранти, гIяхIли, ну дебали разилира заллизир ишдицад адамти цалабикили чебаибхIели. Чуйна иш жагаси белчIудила заведениелиз­и ракIасра, дила хъулир сархIеливан бил­зули саби ва ишарадли чиналра ар­рукьес хIейгули рирус. ХIушала ур­кIила ванадешлис ва бузерила ахъти сархибдешунас халаси баркалла. Къаякентла районна администрацияла шайзибадли школала руководстволис ва педколлективлис халаси баркалла ба­гьахъес дигулра ишгъуна къугъаси бал­буц дураберкIни багьандан. Нушала культурала бекIлибиубсигъуна шалилиз­и халдарес вирар мез. Илди нушала та­рихла давла сари, вегIла мез ункъли далниличибли багьес вирар адамла культурала ва багьудила бетуцличила. Нушани чеалкIуси наслулизира нешла мез ункъли дяркъяхъес хIяжатси саби. Дила неш уруслан риалрира, илини чедетаахъили дарган мез далутири. Ил дудешла хIурматбирнила лишан сабри.
АхIерти дурхIни, хIушанира нешла мез чедетаахъили дяркъурлицунра ахIи, илди хIушачибадли акIубтазира дагьахъес хIяжатси саби. Районна администрацияли гьаннала гIергъира иш школала нешла мез гьаладяхI дашахънила детуцуни гIер­дур­цу. ХIушала гIямрулизир гьарбизуни ва белчIудилизир чедибдешуни диубли ди­гулра.
Балбуцличив гъайухъун ДГУ-ла профессор БяхIяммадов Муса Расулович.
— Дебали разидиахъубра нуша ишбархIи иш жагаси школали, илаб ункъли бучIути дурхIнани ва гъирачеб­ли бузути мугIяллимтани. Нуни пах­­­ру­бирулра ишгъуна даргантала гIя­да­тунала, мезла ва культурала хъарихъли бетаурси Вихърила шира илаб иш­гъуна школара лебниличи. Ишав цалра учIан яра мугIяллим хIергар Зарип­ат Мя­хIям­ма­довани дурсри кахIе­ди­хьибти. ДГУ-лизи каберхурти студентуни Зарипат Мя­хIяммадовнала уче­­никуни биъниличила балусири нуни илдала хIядурдеш, нешла мез ва бяркъла шалуби ункъли далнила даража хIясибли. Илди преподавательтала умутчебти кумекчиби ва белчIудилизиб декIарбулхъути студентуни бирути саби мурталра. Илдани илкьяйдали чула мугIяллимтала ва школала хIурмат ахъли бихIуси саби. Дагъис­тан­на школабазиб гIяхIсигъуна нешла мезла кабинет Меусишабси биъни ба­гьур­хIели, Зарипат МяхIяммадовна ила рякьунсири ва Дагъистанна халкьла писатель, Дагъистан Республикала урибси учитель Расул Мусаевичла бузериличил тянишриубсири. Гьести гIямрула адамлис, гьайгьайрагу, ила рукьес гьамадли ахIенри, амма вегIла санигIятличи дигили вицIибси адам сегъунтилра къияндешуначи хIерикIуси ахIен. Расул Мусаевичла шайзибадли илала бегIла гIергъи дурабухъунси жузра илис пешкешбирулра. Илини вихърантала халаси хIурматбиру. Илини школалисра сунела декIар-декIарти дусмазир дурадухъунти жузи савгъатдирули сай. Нуни делкIунти нешла мезла мугIяллимтас хасдарибти методикала шайчирти жузира лугулра ил школала библиотекалис. Наб дебали гIяхIбизур вихърантачила ХIябиб ГIялиевла жуз. ДГУ-ла филологияла факультетлизи кадерхахъес жидирулрая Вихърила школала бучIанти.
Дунъяличир верхIел азирличи гъамли мезани лер. ЮНЕСКО-ли илдазирадли 2500-дехI мез детихъес асубирутази дуйгIули сари. ГIялимти мурталра пикрибикIули саби илди мез калахъести тяхIурти белгидирули. Илдани бурни хIясибли, мез пайдаладирули лерай, илди детхIейхъур. БегI гьалабси яргализир илди хъалибарглизир дузахъес чебиркур, гIур школа ва пачалихъ къайгъилизи дикес хIяжатси саби илдачила. Мез хIедубкIар илдачил нуша гъайдикIули ле­рай.
Нушани къайгъибирули дирехIе декIар-декIарти далдуцуни дарган мезличил дурадуркIес. Гьайгьай, илгъуна баркьуди гIяхIбилзути гьачамичиб-гьачам имцIабикIулира саби. Ишаб ца се­кIайчилара гьанбушес дигулра. Ца­ца­бехI­тани миллатла палтарра чегьурли, сегъуна-сабил балбуцра дураберкIира или Интернетла цацадехIти детуцунази суратунира видеобира дурхьули сари. Илгъуна секIайчи ну къаршисира. Илгъуна лозунгунала манзил шалгIеббухъи саби. Нушани хъумуртулра гьар бархIи дурхIнази нешла мез далахъули, ибкьли бузути мугIяллимтачила. Мез гьаладяхI дашахънила ва илди мяхIкамдирнила шайчир гьарли-марси хIянчи бирутачила баянти тIинтIдирес хIяжатси саби. Саби хIебузули хьалли, дузулра или къянала баянтира гьаладирхьули, саби чебаахъесцун балбизни гIяхIси баркьуди ахIен.
Дарган мезличил нушала машгьурти поэтунала назмурти дучIухIели студентунани набзи тиладибирусири гIурра ва гIурра илди тикрардарахъес. СенахIенну илдани иргъулри дарган мезлизир гIур чинаралра агарти, тамашала, жагати тIамри лерни. Дагъистанна мезани дебали давлачерти сари, илди чIянкIли мяхIкамдирес ва дигахъес хIяжатти сари. Нуша дирхулра, чеалкIуси наслули илди мяхIкамдирниличи ва гьатIира давлачердирниличи. Нуша ишбархIи лерли хьалли, жагIял дирути ахIенра, хIушала някъбазиб саби нешла мезла кьисмат, хIурматла гIулухъаби, жагьилти. ХIуша дагъистанланти диъни марбарес багьандан уркIи-уркIиларадли мезра дигахъес чебиркур. Дагъистан спортлизибцун ахIен гьалабяхI арбякьунси, лер сецад-дигара цархIил шайчирра чедибдешуни: гIилмулизир, литературализир, культурализир… Гергала школала дарган мезла мугIяллим 7-ибил ва 11 ибил классунала даргала литературала учебникунала автор МяхIяммад Рабазановли «Тамашала грамматика» бикIуси жуз леб 70 ибти дусмазиб белкIунси. Илгъуна жуз цалра мезличил дурабухъунси ахIен Дагъистаннизиб. Ил жузличила гьанна хъумкартурли саби. ХIурматла мугIяллимти, тIалаббарая ил жуз ва пайдалабарая. Къаякентла школализир нешла мезла мугIяллимли рузуси ГIяйша Кьурбановалара «ГIяжаибси азбука» бикIуси дебали гIяхIси жуз саби. Илра пайдалабарес дирудая дурсрачиб. Мисал касес вирар даргала районтазирти школабазир литературала кружокуни дузахъути мугIяллимтачибадли. Илдигъунтазибадли саби Меусишала шилизивадси Расул БяхIяммадов, КIишавадси Ибрагьим Ибрагьимов, Къуппала шилизивадси ГIиса ГIямаров ва цархIилтира.
КIинайс Муса Расуловичли дипломтачил шабагъатлабариб 2019-2020-ибил белчIудила дуслизир регионна кьадрила олимпиадаличир чедирикибси 11 ибил классла ручIан Райсат Абакарова, Вихърила школала гIяхIтигъунти мугIяллимти Зубайдат Абакарова, ХIясайни ГIяппаев, Рустам МуртазагIялиев.
ГIур гъай бедиб «Сагаси Вихърила СОШ» МБОУ-ла директор Чупанов Чупан ЗубайрухIяжиевичлизи.
— ХIурматла гIяхIли, мугIяллимти ва дучIанти, ишбархIи нушала школализиб халаси байрам саби. Нушала школалис ва илаб бузути мугIяллимтас дахъал гIяхIти гъай дуриб ишбархIи. Ил секIай нуша гьатIира уркIичердирахъулра ва бузериличи гъирачердирахъулра.
Гьанна нушани ишгъуна балбуц хIяйнайс дурабуркIулра. Районна администрацияла ва багьудила управлениела кумекличил сагаси школа тIашбатурра нушани ва илар дурадуркIути декIар-декIарти далдуцунира ахъси даражаличир детурхули сари. Илдигъунти далдуцуни дурадуркIнила гIяхIдешличибли мезличи бяхIчииуси пикри, илди мяхIкамдирнилизи ва гьаладяхI дашахънилизи илдани кабирхьуси пай дурхI­нани чебиули саби. Илдалара иштяхI имцIабикIули саби, илдала баркьудлуми даимдарес, нешла мез ункъли дяркъес. Ил саби бегIлара гIяхIси дарс ва мисал.
Наб баркалла багьахъес дигулра Дахадаевла, Ахъушала, Лавашала, Сергокъалала, Хайдакьла районтала руко­водительтас, илди районтазибадти пе­дагогунани ишхIелла балбуцлизир бу­тIакьяндеш дарни багьандан. Нушани ишгъуна балбуц гьа­тIира дахъал миллатунала ва­килтала бутIакьяндешличил гIур­ра дурабуркIехIе. Лебилра республи­ка­ла кьадрила бетаэсли.
Балбуц бузахъуси ХIясайни ГIяп­паевлира школабазир нешла мез руркъ­ниличила сунела пикри бу­риб.
— Буралли, нешла мез руркънилизир дахъал къияндешуни къаршидиркули сари.
Наб вехIвихьес дигулра республикала «Замана» газетализиб дурабухъунси дила «Датирая дарган мез» бикIуси поэмаличивад.
ХIейгулра наб дарганти
Дарган мез хIедалути,
Наб гьававан дигулра
Дурхъати мез абала…

Дигулра наб нешличил
ГъайикIес нешла мезли,
Дигулра даргантачил
Разидеш ва пашмандеш
Иргъахъес нешла мезли,…— гьандушиб ХI.ГIяппаевли тугъи.
Нушала республикализиб революциялис гьалаб лукIес ва бучIес балути лебгIеб камтири. Улкали кьасбарибхIели ду­бурланти белкI-белчIличи бур­сибарес, Америкала ва цар­хIилти улкнала гIялимтани ба­гьахъурсири илгъуна баркьудилис 250 дус хIяжатдиркур или. Амма дубурланти илдас гьан­биркуливан, илцадра гIе­л­акабухъунти ахIенри ва 30 дусла бухIнаб 100 процентла кьадарлизиб ил масъала арзибсири.
Даргантала игъбарлизи хал­барес вирар машгьурси гIялим Сагид ГIябдуллаевли дар­­гала алфавит, урусла-дар­гала словарь, орфография­ла словарьти, грамматика цаладяхъни. Иш­бар­хIила манзиллизиб биалли, нушала хала хIякимтани мил­латунала мезаначи пикри бяхIчихIейъни хIейгеси анцI­букь саби. Неш дигусилис илала мезра дигахъес хIяжатси са­би. Се­гъуна дубурлан вируси сунела нешла мезли гъайикIес хIе­ба­лу­си?
Миллатла мезаначил дурадулхъути газетаби-журналти ишгъуна къиянси даражаличир хIедири, илди гIердуцес хIя­кимтала къайгъни диалри. Школабазир пайдаладирути учебникуначилара дахъал разиагардешуни лер мугIяллимтала. Илди лерилра масъулти къантI­си заманала духIнар ар­зес хIяжатбиркур. БегI гьалабси яргализиб, бегIтани чу­ла дурхIни нешла мезличи бяркъес хIяжатси саби. Мез гьа­ладяхI дукьяхъес багьандан лебтанилра цIакьани ибкьаили, дузес чебиркур. Мультикуни миллатунала мезаначи шурдалталлира, гIяхIсири. Электронный учебникуни гIердуцес чебиркур нушаб, Му­са Расулович. ИшбархIи лу­кIули лебти писательтани ва поэтунани ила чула белкIани кадерхахъесра бири. Вихърила шилизибадти шел рурсили ДГУ-ла филфак таманаили саби, леб гIурра илаб бучIес хьулбикIути.
«Дигахъеная ва гьаладяхI дашахъеная дарган мез» ибси докладличил гъайрухъун Краснопартизанскла школала нешла мезла мугIяллим, 2018 ибил дуслизир лебил Россияла урус ва нешла мезанала мугIяллимтала конкурсличир чедирикибси Насибат ХIяжиева. Илинира сунела бузерилизир къаршидиркути мезанала шайчирти масъултачила сари-регIти пикруми дуриб.
Гъайбухъун илкьяйдали нешла мезла мугIяллим, поэт ГIяйша Кьурбанова, иш макьалала автор, Хизри Юсупов, даргала районтала мугIяллимти. Дарган мезли ва къумукъла мезли жагали назмурти делчIун бучIантани ва инсценировкаби чедаахъиб.
Цалабикибти гIя­шикь­биахъуб 2-ибил «б» классла ручIан Малика Казибековани узис нешла мезли белчIунси гардла далайли.
Зайдухъун балбуцличир далайла ва делхъла агурби. Балбуцла ахирличиб вихърантани гIяхIлас давлачебси кьумур хIядурбарилри.
70 мугIяллимли 738 дурхIя бу­чIахъуси школализиб мурт­рил дубурла районтазирти бел­чIудила заведениебазибсигъуна даргандешла гьав гьанарулри. Муртрил дубурличибадли диркьаличи гечбиубти вихърантани чучил дарх хилри хала бегIтала культурала ва гIядатунала дур­хъати детуцуни. Хаслира чула нешла мез бамбализир мур­гьиван мяхIкамдирнилис бикь­ридеш дирулри илаб биштIа-ха­лати чIянкIли нешла мезлицун гъайбикIнили. Сецад игъбарла бегIти сабил илди чула цахIнабси шира, шилизиб илгъуна мез мяхIкамдирнила гIевдухьра лебти. Ил, гьайгьай, халаси талихI саби чеалкIуси наслулара. ТалихIра гьарбизунира каммадиаб, кабизалачебти ва ламус-яхIли бицIибти вихърантала гIямрулизир.