АвцIали дусра-сера гьалаб ши­ли­зибцун ахIенну, район­на ши­мазибра хIур­мат­личил бу­рути вер­­хIел уркухъан ца кьумурланти бетаур­ти­ри. Илди гьаланачи цабехIличи ца­бехI баши. ГIур байрумти, саби акIуб­ти бурхIнала шадлихъуни дарх, аргъла шуртIрачи хIер­хIеили, уржили дурадуркIесбииб. Би­зи­ти хинкIала, чудни-хинкIала ва чу­мал-гьа­тIи хурег далкьарахънила уст­ни­ра саб­ри ил кьукьяла вакилти. Ил­ди саб­ри ГIяб­дул­каримла Мя­хIяммад, ГIя­марла ХIя­сан, ГIя­лила МяхIям­­мад­хIя­­жи, Иб­ра­гьимла Мя­хIям­мад, ГIяб­дул­кьадирла Мямай. Ил кьу­кьяла вакил­тани шадлихъла замана хIяйт-хIуйтлизибцун ахIенри буркIуси. Шила агьлу-ургав къияндикибси, хIер­ли ахIенси анцIбукьлизи викибси хIисаб­ва­раллири, илис бирусигъуна кумек гIеббаахъесра хIя­ракат бирусири. Районна диштIати ва ха­лати шимала халкьличилра илдани ну бур­сикаварира разидешра пашмандешра бу­тIа цугли дуртIахъес.

Набра хабарагарли хIурматла адамтала кьукьялизив хIябцIали дус гьалав вагьаривиубли увухъунра.
Пашманра хIейубра. Илдани ну минала бегI­тала дурхъати гIядатунала хазнализи ухI­накаира, мякьлавсилис ва гьарахъсилис даим дяхI шалали виахъес живирира, гIя­хIял-шандешла гьундурикад гьарзали вашахъес бурсикаварира. Цазаманализи­в нура дила мякьлабтира вайнукьабачил бал­хIе­бикахъес, бахъла гIямрулис диргаладешу­ни дакIудулхъахъути мякьлаб къарши­биркалли, илдас насихIятуни дурахъес ва илдигъунти адамти бархьси гьунчибад ба­­шахъес ихтилатуни дурадуркIахъес мах­би­кIи.
Агь, замана, замана! ИшбархIи чедиб гьан­бушибти итди дусмала багьадур­та­зибад цацун сай мицIирли левалси. Ил­ра шагьарла ца анкъилав, арадешли цIу­ми­кIахъули, гьархIели шилизир лералти, чула гIибратла гьундурикад дашути нушаб са­ламикIули паргъатхIейруси багьадур дубурлан, бахъли валуси, урчIемцIали дусла гIямруличи айуси ГIябдулкьадирла Мямай сай. ШалгIеббухъунси дусла ахирличир илини тIамадариб:
— Набигуллагь, аркьуси дус шал­гIеб­бал­туси шадлихъличи мурт цаладиркулрая? ХIуни балад, сецад дигулрал хIу­шала мякьлав виэс! Сепайда, кьяшмани хIелтулра. Жан дила унра, цаладикирая!
— Баркалла нуша хъумхIертнилис. Балулра хIела арадешла аги-хIял. ХIед арадеш диубли дигнила пигьлуми ахъдурцехIе, — паргъатварира Мямай.
Чумал дус гьалав нушала къушумлизи алавуцили левси унра шан, гIергъити дусмазив Каспийск шагьарлизи гечиубси Алжанбег Алжанбековлира зянкъдяхъиб ва сай ишдусла шадлихъличи вакIес бет­­хIер­ни­личила багьахъур. Илисра арадеш­ра гIяхI­дешунира далги, аркьуси дус шал­гIеб­батес ва сагаси дуслис гьунидаэс, кьумур бал­кьаахъес дархира.
— Дила халати узби, — дугьавизур нушачи уркухъанти-ургавад бегI гьалав пагьлива гьунчи дуравхъи вируси, ишди бурхIназив сунела кулпетличил гьарахъси Калмыкиялизив узуси ва хIерируси, гьарил нушала балбуцличи кабизахъурси заманалис гьалав вашуси Кьурба Рабада ГIялисултIан. – Иш яр­гализиб дила юртлизиб дурабуркIехIе ну­шала шадлихъ. Диргалаулхъуси, паргъата­гардикахъеси юртлизив агара. Заманара къиянси саби, бугIярдешлира дяхIила кIи­ликI­­мара дурар дигуливан вяшдикIахъес хIе­­далтара. Нушала халатигъунтала арадешра даглагъуна ахIен.
Иличил кьабулдикира. ВерхIел уртахъ СягIидуллагь Кьурбановра, уркухъан ветаурси минала дугIахъарилан ХIусайла ГIябдулхIямидра, районна дявила ва бузерила ветерантала председатель Мухтар ГIябдуллабековра, чIишилан Шамхал Шамхаловра, ишди тугъала авторра, дахъал дусмазив районна гьундурала управлениелис бекIдешдирули калунси ХIясайни ХIясайниевра, сай ГIялисултIанра. Иш­хIел­ла тIалабунала лерилра шалуби су­незир парх­кадикIуси юртлизир нуша камси заманала духIнар верхIелра ца хъалибаргличи шурдухъунра, берк-берж далкьарахъули детархира.
— Дила гIямрулизив гьачамцун ахIи, чей­хъу­ти излумачи вяхIягира. Аринж­ла, чахьала, хъехI­ла ва чумал-гьатIи изай итил дунъялич­и аркули хIилхIи калунра. Чей­хъуси изала да­кIу­бухънила тIама-гьа­ма­ дехI­дихьибмад, ул­­кала бургани ил иза­ла агарбирути дармун­ти бусягIятал да­кIу­ди­рахъи ва халатасра биш­тIа­тасра кадизахъурти замунтазир укол­т­и дарахъили, кахси изайчила хъумуртахъи. Ну­ша гIям­ру­ла гьарзаси гьунчирад азадли да­шули дирехIери. Гьанна­ изайчила те­ле­ви­зортазирра кьакьурбазирра хIедурути агара. Иличила нуничибра хIушани гIяхIил ба­­лулра,—викIар 90 дусла гIямрула гьуни ахъес илцад халаси замана агарси Ся­гIи­дул­лагь-ацци, чидиллирил ил изайчила гъай ахъ­ду­циб­хIели.
— ХIела пикриличил кьабулиркусра. Коронавирус улкализиб агарбарес пик­ри­бикIули хIебиэс викIулра. ХIуниван нунира чейхъути излумачила виш­тIа­хIелира, педучилищелизив ва университетлизив учIухIелира, гIярмияла къяяназивхIелира дирути уколти хъумхIертули левалра. Дирхаирая, дила къакъла ца гIямзилаб итхIели барибси ца уколла асар бусягIятра лебал, — викIули вехIихьира нура.
— СягIидуллагь, хIуни гIяхIил балад ящур или ируси изалара. Илини хибти зарулти сецад лерри?
— 1950 ибти дусмазир районна колхозунала мазала мас дуцIрумла дуки-гьунила мер-мусаличи диахъухIели, ящур бикIуси изала багьарбиубсири. Нушала колхозла азирцад мазала мас гьунчир дебкIибтири. Ит­хIели нушаб кумекличи бакIибтири республикалацун ахIенну, улкала ветеринарный хIянчизартира, — нушала хала дудешли сайси СягIидуллагь-аццини ихтилат даимбариб.
— Даширая далтехIе излумачила гъай. Чумал дев дурисра шалгIеббулхъуси дус­ли­чила. Нушаб 20-ибил дусли илцад дахъал харабдешуни хIехиб. Даршули калунра. Амма дунъяла гIям­зур­базир, хаслира Сириялизир, диубти дургъбани азирти адамти заманалис гьа­лаб итил дунъяличи арбукиб. Армениял­а ва Азербайжанна ургарти дургъбира тIашаэс бажардибикиб улкала хIякимти. Баркалла илдас иларти дургъбас ахир кабихьес цIакьанира, гIякьлура, къайгъира да­кIу­барибти, —ихтилат даимбариб Мухтар ГIябдуллабековли.
—ХIечил кьабулиркусра. Аркьуси дусличила дила пикри бурасли, гьаларти дусмазивван паргъатагарвиркахъули увухъун­ра Украинали. Гьайгьайрагу, гIергъити буз­ра­зив Белоруссиялизир кадиркути анцI­­бу­кьу­­нанира. Улкнала даршути хIя­ра­катуни, бар­кьудлуми саби бикIуйхIи кес дигути дяхIагарти хала хIякимтала къунбани чархла биркIанти руржесиули дирар. Чи саби илди? Арцла гавлагуни саби. Азирти дусми гьалабра лебтири давла багьандан дургъби адилкьути. Илдала къур дусличи-дус бухъули биэс викIулра. ГIеббердаб сабину! Гьари, хIисаббарая нушала улкализиб сецад лебал илдигъунти гIядатла адамтачиб чебдукарбирхIути, — викIули ну левли, ГIялисултIа тIамали буруси чеббердахъиб.
— Гьари, датирая хIушала политикала черкадти тIама-гьаману, даширая кумекличи! Диъ белхьи саби. ХинкIи адушес адизирая, —иб илини разили.
Адизурра нура ГIябдулхIямидра. Гьаланачи белхьунси диъличи зе писдарира, гIур кIапIбарира. БукIун хинкIи шангла дашахъес дехIдихьира.
— Нуша сен хинкIачицун хIертира. Шам­хал, чехIебиулрив столла ца шайчибси­ чIянкIила бутIали кIапIбарибси кьумур. Илаб кьалли уркухъан гIявакк лебси саби.Гьари, гьаргбарану ил, дисличил бутI­надбара, — дугьаизур нушала Узун Ся­гIи­дул­лагь. ГIе, гIе, шилизиб илис илкьяйда би­кIути саби. Иличила. Диркьаланта узун ибси дев ахъли чейуси адамлис иру би­кIар. Нуша диштIахIели, машинала гIела «делсес» бикаллири, халаси гьунарлизи буй­гIусири. Илкьяйда машинала гIелала бу­цес къайгъилизи ахъибси СягIидуллагь, бахъал адамти хIеркабикIули, илала хIул­ру­мау викиб, кIина иличибад ил чедибухъун. Ми­цIир­ли калун. ГIурра дахъал дусмазив арали ва гIяхIли калаб сайну!
ХIерая, чарх-бекIлизив валгунси чIи­ши­лан багьадурли гIявакк кьисбариб ва илала цаибил бутIа СягIидуллагь-аццила гьала кабихьиб.
— Тямадаби, даширая нушани минала бегIтала гIядат хIебулэхIе. Гьаланачи хин­кIа дукехIе, гIур гIяваккра бекIбирехIе. ГIя­лисултIан, белхьив хIела хинкI?—дугьаизур иличи дахъал дусмазив районна гьундурала управлениелис бекIдешдирули калунси, ишди бурхIназивра цабутIаван шимази башути гьундурала агиличи хIе­руди бузахъес замана бургуси ХIясайни ХIя­сай­ниевли.
— ДугIхъан хъярчи ХIямид, айзи гIурра, на­б гьачам-гьатIи кумек гIеббаахъа. Кьям-кIу­­цIул хIядурли сари. Столличи кьацIра, някъби ушкутира кадихьа. ХIуни, Шамхал, итан зерши балкьаахъа. Нуни хинкIи ка­дил­тIас­ра. ГIе, столличир шин диахъесра хъум­­мар­тидая, — гьанна буйрухъикIесииб хъа вегI.
Узили ветаурси ХIямидлис, ГIялисултIай сен хъярчи ибара? Лебли баланри илис са­бабра. Сунела гIямрула имцIатигъунти дусми шоферли узули, гьаланачи районна, гIур республикала, гIергъити дусмазир Россияла шимира шагьуртира чедидяхъибси дугIахъарлан нушани мукърачив хъярчили чейули дирухIели валанри хъа вегIли илала чеу гьанбикахъибси.
— Шин чинар лера? Агь, хIябилра мискиндарили лерра кьалли нуша районна ва шила хIякимтани шинна шайчир, — викIуси Мухтар айзур, шинна бадира лебси гIямзила гъамиуб.
ИлхIели дила бекIлизи хьурадиубти пикруми ца шайчир датес хIейрусра. Партияла дусмазибал районна хала хIякимти Бутау къадаларад Уркарахъи шин кес аварализи ахъибтири. Далкьа­ахъур лерилра документуни, харждариб гIяхIцад арцра. Амма райцентрлизи шин кес хIебиуб. ИтхIелира гьести гIям­рула адамти икIарад шин кес хIе­ди­рудаяну, дугIла авара датирая или хIя­­кимтас насихIятуна бугьули, Къяба дубурла шинна давла пайдалабарахъес махбикIутири. Сепайда…
(Хьарахъуд бирар)