Ишдуслизиб нушала газетализиб сагаси рубрика бирар. Нушани илис «НикIа спортсменти» бирхьулра. Ил рубрикализир спортличил гьалмагъбикибти, илар чедибдешуни сархибти ва сархес кьасла бегIти биштIати спортсментачила белкIани ва чула сархибдешуни мардирути грамотабала, медальтала, кубокунала суратунира гьаладирхьути сари.
Сагаси рубрикала цаибси макьалала игит МяхIячкъалала 59 ибил школала 4-ибил классла учIан ГIяхIмадхан ГIяхIмадханов сай. Февральла ахирличив ил нушала редакциялизи вакIиб. Редакцияла конференц-заллизир нуша иличил ва илала дудеш Расулличил ихтилатдикIули калунра.
Ихтилатлизир нушаб белгидиуб, ил 10 дус виубси хъярбукан уршила спортлизир диахъубти сархибдешуни.
ГIе, гIе, хъярбукан уршили. Илала хала дудеш ДР-ла урибси учитель ГIяхIмадхан ГIяхIмадханов сай. Ил дила юлдашра сай ва бусягIятла замана Хъярбукла школала учительра сай. Ну дебали разивиубра, виштIаси ГIяхIмадха спортла шайчирти гьунарти мардирути дипломти ва грамотаби чедаибхIели.
— ГIяхIмадхан, хIу чум дус виубхIели спортличил гьалмагъикибсири? – хьарбиулра нуни дарган мезли багьадур уршилизи.
— Шел дус виубхIели. Гьаланачив, ну куртIикIес бурсивиэс вашули вираси, гIур – футболла тренировкабачи, — чарбатур илини дарган мезли жаваб.
— Гъудурти журабазиб цацали бирхIнила (смешанные единоборства) абзаначи вашес мурт вехIихьибсири? – даимбирулра нуни ихтилат.
— ГIяхIмадхай гьачам гъудурти журабазиб цацали бирхIнила абзаначир бутIакьяндеш дарили ахIен, — уршилис кьадин жаваб чарбатур дудеш Расулли. – Байхъала дус гьалав ил «Динамо»-ла цаибил мер багьанданти някъ-някъли бирхIути (рукопашный бой) республикала абзаначив чедиикиб. Ил сабри ГIяхIмадха спортла шайчибси бегI гьалабси чедибдешра. Ишдусла февральла 21-личир МяхIячкъалализир детерхурти абзаначиб илини «Победитель супер-серии» бикIуси грамотара сархиб.
— Дагъиста дурар детерхурти абзаначи ГIяхIмадхан гьанналис вашули хIергар, — викIулра ну.
— СейкIулри гъари хIу? Ишдусла январьла 31-личир Санкт-Петербурглизир детерхурти дунъяла халкьани-ургарти абзаначира вякьунсигу дила урши, —пахруличил викIар Расул ва гьабуциб наб, урусла ва англияла мезли белкIунси 3-эсил мер буцнила диплом.
Буралли, 10 дусла дурхIяли сархибси чедибдеш марбируси документли уршила чIумати уркIи-хIял ва халаси цIакь лернилис бикьридеш дирули сари.
Нушала редакцияла конференц-заллизибти хIянчизартира ил дипломличил тянишбиуб.
Илис гIергъи, нушани ГIяхIмадхан ГIяхIмадхановла суратунира касира. ГIур нушачи гIяхIладли бакIнилис виштIаси ГIяхIмадхайс ва илала дудешлис нушани халаси баркалла багьахъурра, уршилис спортлизир халати сархибдешуни далгунра.
