Нушани гьалабра бурибтири макрукьябазибад ва шилтахъчибазибад мяхIкамдеш бирахъес. Бел­чIу­дила дус гъамбикIуцад макрукьябира жигарчеббиуб­ли саби. Илдани сагати тяхIурти далдурцули саби шко­лабала бучIантала бегIти биргIябиргес багьандан. Иличил бархбасахъи, хIушазира бурес дигулра им­цIали пайдаладирути гIямултачила.
Бурес чебиркур, макрукьябани имцIаливан классла руководительтала, завучунала ва бегIтала комитетла вакилтала гIердарили зянкъбикIули яра чатлизи лукIули саби. Илдани кабинетлизи техника асес, экскурсия дураберкIес ва ремонтбарес или арц дурчули саби. Ил багьандан сахъли диэс чебиркур.
ДекIарси уюн пикрибарили саби цаибил класслизи аркьути дурхIнала бегIтасра. Илдази бурули саби классунала сияхIлизир дарсдешуни детаурли сари или ва ил «учIан сияхIлизив виъни марбарес» багьандан СМС-код тиладибирули саби. Иличибли «личный кабинетлизи» ва «Госуслуги»-бази бухIнабухъахъес ихтиярбирули саби.
ЦагьатIи тIинтIбиубси тяхIяр гьанбушес дигулра – мугIяллимтала бархIилис вавнала халуби ва савгъатуни дирцниличил бархбасунси. БегIтала чатанази смс–каби дурхьули сари акциябачил ва сайтаначи ссылкабачил. Се-биалра гIяхIбизурси секIал асес багьандан адамли банкла картала реквизитуни делкIалли, карталичирти лерилра арц уркайсули саби. Гьайгьайрагу, асибси секIалра чилилра лебхули ахIен.
ХIера, ихдигъунти макру дирули саби гьаннала замана адамти биргIябиргес багьандан. Ил сабаблира дебали сахъли диахъес жидирулрая, ахIерти юлдашуни, макрукьябази диргIяхIедиргахъес багьандан. БалхIебалутала номертачирад дашути я зянкъличи, я смс-кабачи пикри бяхIчихIеили далтес гIягIнибиркур, сенкIун илдала аварали карталичирти арц агарли адамти балтули саби. ДиргIяхIедиэс мяхIкамдеш биреная.

Наида Гъуруева