Россияла Президент Владимир Путинна ХIукму хIясибли, Мухтар Къамбулатов «Рос­сия­ла Федерацияла урибси ху­­­дожник» ибси уличи лай­икьи­киб. Ил анцI­букь мар­би­ру­си кагъар их­тиюр­тала ба­гьахъ­нибала порталлизи ка­­бя­х­ъили саби. М.Къам­бу­ла­тов М.Джемалла уличилси Да­­гъис­та художествола учи­ли­ще­ла директор сай, сайра Хай­да­кь­ла районнизивад ду­ра­ухъун­си.
Мухтар ХIяжиевич Къамбулатов тарихла анцIбукьуни ва дургъби сипатдарили, суратуни дирнила шайчивси уста сайливан жявлил машгьуриубси сай. Илини сунела халати суратуни Кавказла дергълис ва Дагъиста тарихла анцIбукьунас хасдарили сай. М.Къамбулатовла хIян­чурбазибадли бегIлара машгьурси – «Надир-шагьла гIяс­куртачилси хайдакьлантала дяви. 1741 ибил дус» хасси са­нигIят мурхьли бяркъуртани ахъли кьиматлабарибсири. Ду­дешличил ва узичил дарх илини «Дербентла къалализив Пётр 1-ибил. 1722 ибил дусла ав­густла 23», «Дербентлизиб тур­циялантачил пунтбиъни. 1606-ибил дус», «Хайдакьлизиб иранлантачи къаршили дурабухъни. 1659 ибил дус» бикIути суратуни делкIунтири. Илди хIянчурби ГI.Тахо-Годила уличилси ДР-ла Миллатла музейлизир мяхIкамли дихIули сари.
Мухтар Къамбулатов минала художник сай. Илини В.И.Суриковла уличилси Моск­ва­ла пачалихъла академияла художествола институт хъараахъурси саби. Художникли, Дагъиста жагадешла бутIни урусла акаде­мияла гIя­да­ту­на­чил дархдя­хъили, урхI­мешули ахIенти хIян­чурби ду­райули сай. Тарихла анцI­бу­кьунала ду­рарад илини илкьяй­дали тIа­бигIятра цар­хIилти се­кIул­тира жагали сипатдирули сай. М.Къамбулатовли гIяхI­цад дусмазир М.Джемалла ули­чилси ху­дожествола учили­ще­лис бекI­деш дирули сай. Ил заведениели культурала-ба­­гьудлуми тIинтIдирутала проек­­туназирра республикала район­тази дихути выставкабачирра жигарла бутIакьяндеш диру.
М.Къамбулатовла суратунала галереялизиб ЧебяхIси ВатIа дергъла ветеранти, Россияла Игитуни, СВО-ла бутIакьянчиби, гьаннала заманала адамти чебаэс вирар.
Хайдакьла районна администрацияла пресс-служба