Вузани хъараахъурти жагьилти хIянчиличи кьабулбирнила масъала ишбархIи аргъбаибсили бетаурли саби. Гьар дус нушала республикала вузанани гIяхIцад специалистуни дурайули саби, амма бахъалгъунти жагьилти чула санигIят хIясибли хIянчи баргес хIебирули, къяйцIбикIули саби. Илгъуна анцIбукьлис сабабли бетарули саби вузлизир дучIахъути программаби ва хIянчи бедлугантала тIалабуни цаличил ца далхIедиркни. ХIянчурбачирти тяхIяр-кьяйдаличил вузаназир кайсахъути багьудлумала бархбасуни агара. ХIянчи бедлугантас устадеш лерти специалистуни дигули саби. Пикриухъалли, ил гIекIибси авид (замкнутый круг) бетарулигу: устадеш агарли хIянчиличи урцули ахIен, жагьилти хIебузалли, илдани устадеш чинарад кайсути.
ЦархIил сабаб саби вузаназир хIянчила хIекьлизир насихIятуни гIердурнила ва санигIят чеббиркIнила тяхIяр-кьяйдализирти нукьсандешуни. Бахъалгъунти студентуни кьанни пикрибулхъули саби челябкьлализиб чус сегъуна санигIят хIясибли бузес дигулил. Илдани хIянчила хIекьлизирти масъултачила балули ахIен кьалли. ЦацабехIтани чердикIибти санигIятуни челябкьлализир тIалабхIедирутили детарули сари.
Илала дурабадра, нушала республикализибси экономикала аги-кьяйдаличилара хъумартес асухIебирар. ХIянчила мерличи кабиэс дигутала абзанани, белгити кьялубазир хIянчила мерани агнили, камси алапа бедлугнили жагьти специалистунала умутуни мардирахъули ахIен. Нушанира чебиулра хIукуматла хIянчиличир халати алапаби кахIейсни. Къияндешуначи бяхIягибти жагьилти уркIиагарбирули саби, гьайгьайрагу, бекIлил хIянчи агарлира убкалули саби. Леб камси алапаличи хIерхIеили, бузутира, амма ца мерличиб бахъхIи кавлули ахIен. Дипломти касибти специалистуни цархIил баркьудилизи ихъули саби, чула санигIят хIясибли хIянчурби агни яра, лерли хьалли, алапа камси биъни багьандан.
ЧебяхIси даражала багьуди касибти жагьилти хIянчи агарли кахIелахъес багьандан, вузани ва хIянчи бедлуганти-ургаб цIацIаси бархбас кабилзахъес чебиркур или гьанбиркули саби. ИлхIели жагьилтира хIянчиличил гIеббуцили бирар регионна экономикара гьалабяхI башар.
ПатIимат Мирзаева
