Ишдус, рахли ми­цIир­ли кали виалри, Дагъиста халкьла писатель ГIяхIмадхан Абу-Бакар 95 дус вирусири. «ГIур­рара сецад гIяхIти жузи дел­кIишира илини, —бекIлизи башар дила, — гьанна бикайчи лукIалри».
Тамай 60 дусалра хIейубси писательла творчество 30-чибра имцIали жузлизи каберхурси саби. Ила кадерхурли сари илала хабурти, повестуни, пьесаби ва романти. Илала произведениеби хIясибли 12 кинофильм дураибти сари. Им­цIа­ти кинофильмабас сцена­рийти делкIунсира ГI.Абу-Ба­кар сайри.
ГIяхIмадхан Абу-Бакар дар­­ган мезливан урус мезлира ус­тадешличил лукIусири. Цаца­дехIти ГI.Абу-Бакарла произведениеби нушала улкала тах шагьарлизир ва цархIилти шагьуртазир журналтазир урус мезличил дурадулхъутири.
ГI.Абу-Бакар нуни 60 ибти дусмачивад валусири. Асубирар нуни, педучилищелизив учIухIелира,1960-1964-ибти дусмазив, илала сегъуна-биалра произведение белчIунси биэс. Амма дусмала бухъяндешли наб ил гьанбиркули ахIен.
Бархьси саби, башули бири нушала поэтуни ва писательти Сергокъалала педучилищела бучIантачил гьунибаэсра. Гьачам нушачи 5-6 даргала поэт бакIибтири, амма илдала ургав ГIяхIмадхан Абу-Бакар леврил наб гьанхIебиркур. Леври Сулайбан Рабаданов, Рашид Рашидов. ЦархIилти гьанбиркули ахIен.
ГI.Абу-Ба­кар­личилси ди­ла тя­нишдешлизи ну­­ни халбирулра 1964 ибил дуслизиб ро­ман-газетализиб урус мезличил дурабухъунси илала жуз «Дар­гала рурсби» белчIни. ГIе, ит­хIейчивад сай нуни ГIяхI­мад­хан Абу-Бакар валуси. Писа­тельличил ну тянишвариб­си илала «Даргала рурсби» повестьли сайра. ИтхIели 17 дус виубси ну, Сергокъалала пе­­дучилище таманаили, Даха­даев­ла районна Вихърила ге­хIел дусла школализив учительли узулри. Чинабад бикибал хIебалас, наб ГIяхIмадха повестьличилси роман-газета бикиб. Ил нуни кIина-хIяйна бел­­чIунра ургус.
Наб ил дебали гIяхIбизур биэс гIягIнилири. Ну писательли буруси гьарил девличи вирхарусири. Повестьлизибси шила у Уркух нуни Уркарахълизи халбарира. Дахъал маза дирутири Уркухъла колхозла. «ХIебиалли жузлизир авторли букIуначила дурутира гьарли-марли гIямрулизиб лебти букIуначила сари, —пик­­ривикIулри ну. – Хъямла къа­да­нибси гIинцбала анхъличила бургар жузлизибти хьунул адамти гъайбикIутира». Вирхаурра ну халаси ахIенси дубурла шилизиб ца дугилизиб урегал рурси акIниличира. ЦархIилван бурасли, ну ГIяхIмадхан Абу-Бакарли сунела жузлизиб гьанбушибси гьар секIайчи тамай вирхкарули уилра. ЧIянкIли пагьмукар писательцун сай илкьяйдали лукIес вируси. Цаибилгъуна, учIусини илала произведениебазиб гьар бархIи сунес къаршибиркути адамти чебиънилизиб саби писательла пагьмукардеш. КIиибил, дила пикрили, писательла пагьмукардешла лишан саби илала произведениеби гьамадли ду­чIес вирнира.
Ит дус бииши, «Дагестанс­кая правда»-лизибрил яра «Ком­сомолец Дагестана»-ли­зиб­рил нуни ГIяхIмадха повестьличил бархбасунси сурат чебаибсири. Суратлизив ГI.Абу-Бакар жагьти рурсбала урга кайилри. Суратла удиб лебри иш белкIра: «ГIяхIмадхан Абу-Бакар сунела игитунала ургав». Вирхаурра вииша ну иличира, касили баягъи ит суратла бегI газетара, ну Мажалислизи вякьунсири. Колхозла дехла машинала кузовла кайибси нуни Мажалислизи ваайчи писательла повестьла игитунала уми тикрардирутири. «Насиба, Къистаман, Зайнаб, ГIяшура, Сакинат, Фатима» викIули, ахъли учIусири ну Мажалислизи ваайчи. Гьунчиб къаршибикибти адамтази хьарикIули, баргира Хайдакьла районна библиотека: газетализи белкIни хIясибли, библиотекализив уилри писатель сунела игитуначил къаршивикибси.
Къунби дуилри ил сурат касибси ва удиб белкI барибси журналистла: суратлизибти рурсби Насибахъали ва Къистаманхъали ахIенрину, Мажалисла кьакьалаб баргибти пулан рурсбири. Или биалра, журналист ишав дебали-декIар хатIаикили ахIен: суратлизибтира даргала рурсбири кьалли.
1968 ибил дуслизив ДГУ-лизи учIес керхурси ну гьарли-марли мицIирси ГI.Абу-Бакар­личил къаршивиркули вираси. МяхIяч­къалализибси Буйнакъскийла кьакьализибси «Дружба» кинотеатрлизи укьес билет асибси ну цацахIели илаб мерлабиубси Дагъиста пи­сательтала Союзлизи дила шан ва унра Сулайбан Рабаданов­личи вашули вираси. Илав ГIяхIмадхан Абу-Бакарличилра чуйнара къаршиикира. Арбякьунси даршдусла 80 ибти дусмазив шагьарлизи гIяхIлад вакIибси наб иличил ца берк-бержличилси шадлихъличира кайэс бикиб. ГIурра къаршиикира ну ГIяхIмадхайчил ца шад­лихъличив Мажалислизи­бад Уркарахълизи башуси гьунила дублабси урунжла мякьлав – ГIя­лихIяжила гIиниз бикIуси са­би илис.
ХIера, илала лерилрара-сера жузи нуни делчIунти диъ­­ни халхIебарахIелли, ил­ди сари дила чевяхIси пи­са­тель­ли­­чилти тянишдеш.