Хайдакьла район­низиб «Культурала код. Хай­дакь: Дагъиста камси мил­латла мез ва культура мяхI­кам­дар­ни» бикIуси проект гIям­рули­зиб бетурхахъули саби. Ил проектли ДР-ла БекIла Грант сархибсири. Проектла автор ва руководитель, Россияла халкь­ла мастер ва ДР-ла куль­турала рурибси хIянчизар Зу­бай­дат ХIясановани сунела бекI­дешлиубси кьукьяла гьала Хай­дакьла культурала давла, гIядатуни, мез мяхIкамдарес ва чеалкIути наслубачи даахъес ибси масъала тIашбатурли са­ри.
Проектла дазурбазир гьар баз «Машгьурси Хайдакь» ибси уличилти далдуцуни, «Нас­­лубала мургьила гьимир» би­кIути някъла хIянчурбала ус­тадешла дурсри ва секIал хай­дакьла някьишли жагадирнила дурсри дурадуркIули сари. Де­кIарси пикри бяхI­чи­иули саби хайдакьла мез мяхI­кам­дирниличира. Специа­лис­тунани районна шимази ар­хIяби дурадуркIули сари, гьести гIямрула адамтачил гьунибиули, хайдакьла лугъатличил ха­бурти, назмурти, буралаби, багьи­раби ва бекIахъудила гIям­­рулизир дузахъути дугьби дур­чули сари. КIинайс илди социальные сетанази кадирхъули сари.
Гьалабван илгъуна хIянчи даимбиуб Мижигълила шилизиб. Шила школализиб «Мез ва культура — халкьла ми­цIирти рухI» бикIуси гьу­ни­баъни бетерхур. Иличир дурхI­нани, педагогунани, «Хай­дакьла някьиш» этноцентр­ла спе­циалистунани ва шила ха­ла­тани бутIакьяндеш дариб. Школа ца бархIилис халкьла культурала хасдешунала гьар­­­ли-марси юрт-азбарличи шур­бу­хъун. Илар хайдакьла машгьурти някьишла ислаби ва гIядатла хурегуни гьаладихьиб, мерличибти хьунул адамти К.Кьурбановани ва А.Ра­ба­да­но­вани дурхIя сири­лизи калт­нила гIядат чебаахъиб. Зубайдат ХIясановани хай­дакьла някьиш­ла тарих­личила буриб.
Школализиб бучIути дурхI­на­нира чула лугъатличил назмурти делчIун, далуйти зайдухъахъун, хабурти дуриб.
Илдигъунти гьунибаъниби рухIла давла мяхIкамбирнилис сабабли детарули сари. ВегIла мез дузахъули, дурхъати гIяда­туни наслуличирад-наслуличи диахъули лерай Хайдакьла культурала рухI мицIирли кавлан.